“Odil sudlovga erishish imkoniyatlarini yanada kengaytirish va sudlar faoliyati samaradorligini oshirishga doir qo‘shimcha chora-tadbirlar to‘g‘risida”gi prezident farmoni qabul qilindi.
Hujjat bilan sudning mustaqilligi va sudyalar daxlsizligini ta’minlashni kuchaytirish bo‘yicha choralar belgilanmoqda.
Xususan, sudga hurmatsizlik qilish holatlarining oldini olishning samarali mexanizmlari ishlab chiqilib, buning uchun ma’muriy javobgarlik choralarini kuchaytirish va jinoiy javobgarlik belgilanishi ko‘zda tutilmoqda.
Sud ishlarini hal etishga aralashganlik va sud hujjatini ijro etmaganlik uchun javobgarlik choralari kuchaytiriladi. Shuningdek, sud hujjatlarining ijro etilishini ta’minlashga qaratilgan ta’sirchan mexanizmlar joriy etiladi.
Odil sudlovni amalga oshirish faoliyatiga aralashganlikka oid har bir jinoyat ishi yakuni bo‘yicha jamoatchilikni ommaviy axborot vositalari orqali majburiy ravishda xabardor qilish tartibi joriy etiladi.
Sudyaga nisbatan turar joy daxlsizligiga, yozishmalar, telefon orqali so‘zlashuvlar va boshqa so‘zlashuvlar, aloqa tarmoqlari orqali uzatiladigan pochta, kuryerlik jo‘natmalari va telegraf xabarlarining sir saqlanishiga bo‘lgan huquqlarni cheklovchi, shuningdek, abonentlar yoki abonent qurilmalari o‘rtasidagi bog‘lanishlar to‘g‘risidagi axborotni olishdan iborat tezkor-qidiruv tadbirlarining o‘tkazilishiga faqat bosh prokurorning sanksiyasi asosida yo‘l qo‘yilishi belgilanadi.
Mavzuga doir: O‘zbekistonda ayrim sud ishlarini yuritish ma’muriy organlarga o‘tkaziladi
Izoh (0)