«Биз шартномада урғу бераётган масала — Ўзбекистондаги Сингапур таълим масканлари билан кўламни кенгайтиришга қаратилган» — Олий таълим, фан ва инновациялар вазири ўринбосари

Ўзбекистон президентининг Сингапурга расмий ташрифи арафасида бўлиб ўтган икки давлат тадбиркорлари ўртасидаги ишбилармонлик алоқаларини ҳар томонлама мустаҳкамлашга қаратилган Ўзбекистон-Сингапур бизнес-форумида Олий таълим, фан ва инновациялар вазири ўринбосари Комилжон Каримов интервью берди.

Унинг айтишича, Сингапур – ҳеч қандай табиий ресурсларга эга бўлмаган давлат.

«Лекин бугунги кунда жон бошига қарайдиган бўлсак, дунёдаги энг юқори ялпи ички маҳсулот айнан Сингапурда. Бунинг сири инсон капиталига инвестицияда. Сингапур биринчи навбатда инсон капиталига эътибор қаратиб, таълимга инвестиция киритган. Бу ерда ўқитувчилар мақоми жуда юқори, бутун дунё тан олади», — дейди у.

Таъкидланишича, мамлакат интерграцияга эътибор берган.

«Таълим, фан ва ишлаб чиқариш интеграцияси. Сингапур айнан шунга катта урғу қаратган. Кўплаб лойиҳа ва стартаплар университетларда пайдо бўлиб, иқтисодга катта фойда келтирган.

Бизда охирги йилларда олий таълим қамровини кенгайтиришга эътибор бериляпти – янги университетлар қурилиб, мавжудларини кўлами кенгайтириляпти. Биз шартномада урғу бераётган масала юртимиздаги Сингапур таълим масканлари билан кўламни кенгайтиришга қаратилган», — дейди Комилжон Каримов.