“Daryo” nashri 17-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya Qurolli kuchlari tarkibi 1,5 mln kishiga yetkaziladi va jangovar tarkib kuchaytiriladi
Rossiya mudofaa vaziri Sergey Shoygu Qurolli kuchlar tarkibini 1,5 million kishigacha oshirish masalasi bo‘yicha yig‘ilish o‘tkazdi va qator vazifalarni ilgari surdi. Bu haqda Rossiya Mudofaa vazirligi xabar berdi.
Unda vazir mas'ullarga Kareliya respublikasida armiya korpusini shakllantirish, quruqlikdagi qo‘shinlar tarkibida uchta motoo‘qchilar diviziyasini va ikkita harbiy-desant qo‘shinlari diviziyasini shakllantirishni hamda Harbiy-dengiz floti, Havo-kosmik kuchlari va Strategik maqsadli raketa qo‘shinlari jangovar tarkibini kuchaytirishni topshirdi.
Shuningdek, u ikkita — Moskva va Leningrad harbiy okruglarini yaratishni buyurdi.Rossiya qurolli kuchlari tarkibi, soni va tuzilmasiga kiritish taklif etilgan o‘zgarishlar 2023—2026-yillarda joriy qilinishi rejalashtirilmoqda.
21-dekabr kuni Shoygu Rossiya qurolli kuchlari sonini 1,5 million kishiga, shu jumladan, 670 ming kontrakt askariga yetkazish kerakligini aytgan edi. 1-yanvar kuni Rossiya prezidenti Vladimir Putinning “Rossiya Federatsiyasi Qurolli kuchlari shtat sonini belgilash to‘g‘risida”gi farmoni kuchga kirdi, unga ko‘ra, Rossiya qurolli kuchlari harbiy xizmatchilari soni 1 150 628 kishi deb belgilangan.
AQSH Xitoy bilan Ukrainadagi urushni muhokama qilmoqchi. Xitoy Rossiyaga yordam ko‘rsatmaslik pozitsiyasini qabul qiladimi?
AQSH davlat kotibi Entoni Blinken 5—6-fevral kunlari Xitoyga tashrif buyuradi va u yerda Xitoy tashqi ishlar vaziri Sin Gang bilan uchrashadi. Ular qator masalalar fonida Ukrainadagi urushni muhokama qiladi, deb xabar bermoqda Politico nashri.
Ikki davlat rasmiylarining o‘rtasidagi muzokaralar Indoneziyadagi G20 sammitida boshlangan fikr almashuvining davomi bo‘ladi. Avvalroq Davlat departamenti matbuot kotibi Ned Prays Blinken Xitoyga tashrifi chog‘ida Rossiyaning Ukrainaga qarshi urushi haqida gapirishini ma’lum qilgandi.Uning so‘zlariga ko‘ra, AQSH Xitoy Moskvani qo‘llab-quvvatlamasligi va Rossiyaga jumladan, sanksiyalarni chetlab o‘tishda yordam ko‘rsatmasligiga umid qilmoqda.
Ma’lumot uchun Xitoy yetakchisi Si Szinpinning ishonchli yordamchisi Sin Gang tashqi ishlar vaziri lavozimini egallagunga qadar AQSHda elchi bo‘lib ishlagan. Avval u AQSH prezidenti Jo Baydenning tashqi siyosatini tanqid qilgandi. Voqealar rivojini kuzatamiz
Ukraina o‘z qarshi hujumini boshlash uchun g‘arbdan 100 ta tank kerak. Ammo hammasi, 2023-yilning bahoridagi munosib tayyorgarlikka bog‘liq
Londondagi Xalqaro Strategik Tadqiqotlar Instituti (IISS) ekspertlarining fikricha, Ukrainaga o‘zining qarshi hujumini boshlash uchun G‘arbdan 100 ga yaqin tank kerak, deb yozadi The Guardian.
Britaniya harbiy razvedkasining sobiq rahbari Fil Osborn ham ushbu hisob-kitoblarni ma’qullamoqda, ammo hammasi 2023-yil bahorida Kiyevning munosib tayyorgarligi, yaxshi ta’minot va harbiy rejalariga bog‘liq bo‘ladi, deb ta’kidladi gazeta.
Avvalroq Britaniya Ukrainaga 14 ta Challenger 2 tanklarini va’da qilgandi, Polsha esa Kiyevga yana 14 ta nemis Leopard 2 tankini jo‘natmoqchi, ammo buning uchun Germaniya roziligi kerak. Ayni paytda Ukraina tomoni 300 ta tank va kamida 600 ta jangovar texnika so‘ramoqda.IISS ma’lumotlariga ko‘ra, NATOning 13 davlati armiyasida hozir 2300 dan ortiq Leopard 2 tanklari bor
Amerikalik yozuvchi Toshkentning bo‘lajak hokimiga murojaat yo‘lladi
“O‘tkan kunlar” romanini ingliz tiliga tarjima qilgan Amerikalik yozuvchi Mark Riz Twitter’dagi sahifasida Toshkent shahrining yangi tayinlanadigan hokimiga murojaat qildi.
Murojaatda shahardagi odamlarning yashash tarzini qulaylashtirish bo‘yicha takliflar berilgan. Bularning barchasini Toshkentga katta mehr qo‘ygan inson sifatida aytyapman”, — deb yozadi Mark Riz Twitter’da.
Mark Rizning fikricha, Toshkent shahrida bir qator ishlarni amalga oshirish kerak.
“1-navbatda, Yo‘llar ta’miri va jamoat transportini yaxshilash.Yashil zonalarni kengaytiring.Toshkent Dubay emas, sizda suv havzalari bor.
Daraxtlar masalasi
Hech kim sizni o‘sha baland binolar uchun eslab qolmaydi. Shaxmatchilar ularga soya-salqin joy bergan hokimni duo qiladi, osmono‘par bino qurganni emas. Buni hatto chor Rossiyasi gubernatorlari ham tushungan. Vaziyatni yaxshilash, yashil parklar yaratish uchun Yaponiya, Yevropa Ittifoqi, AQSH, Xitoydan daraxtzorlar olib keling.
Temuriylarning o‘ziga xosliklaridan biri ham aynan yashil maydonlar bo‘lgan — Temur kabi bo‘ling.
Jamoat transporti
Konditsioner va isitish tizimiga ega tramvaylarni qaytaring. Monorels (bir izli temiryo‘l) tizimini quring. Iqtisodiyotning drayverlaridan biri bo‘lgan soha bo‘yicha yirik infratuzilma rejasini istasangiz, jamoat transporti — qulay variant.
Urban ekspertiza
Keyingi masala og‘riqli, lekin agar siz shaharni rekonstruksiya qilmoqchi bo‘lsangiz, sovet davridan qolgan hamma inshootlarni ham saqlab qololmaysiz. 14 qavatli turar joylar energiyani yeb tashlaydi. Suv tanqis hududlardagi binolar baland emas, past bo‘lishi kerak.
Bu ko‘rinishdagi binolar 1966-yilgi zilzilaning natijasi hisoblanadi — sovetcha “rivojlanish”. Rekonstruksiya qilinmagan ulkan binolar bu — falokat uchun retsept, xolos. AQSHning Arizona shtatidagi Feniks shahri bu bo‘yicha juda yaxshi misol bo‘la oladi.Yangi hokim bu — imkoniyat.
Shahar hokimiyati muammolarga yechimi bo‘lgan mustaqil ekspertlarni jalb etishi kerak. Boshqa davlatga ko‘chib o‘tmoqchi bo‘lgan odam, avvalo, ikkita narsaga e’tibor qaratadi: ta’lim va yashash sifati. Ayni damda Toshkent — hamma tuzatishni istaydigan siniq oyna”.
Mark Riz muammolarni sanashdan tashqari, shaharsozlik bo‘yicha o‘z takliflarini ham bergan. Xususan, u Qo‘qon shahri markazi va Toshkentdagi Adiblar xiyobonini qayta qurish yuzasidan rejalarini taqdim etgan. “Bunda Arizonadagi Arkosanti shahridan ilhomlandim”, — deydi Riz.
Izoh (0)