Qirg‘iziston elektr energiyasi iste’moli bo‘yicha rekord o‘rnatdi

Qirg‘iziston energetika vaziri o‘rinbosari Mirlan Jakipov mamlakat so‘nggi uch kun ichida elektr energiyasi iste’moli bo‘yicha rekord o‘rnatganini ma’lum qildi. Bu haqda “Kabar” axborot agentligi xabar berdi.

Vazir o‘rinbosarining so‘zlariga ko‘ra, anomal sovuq tufayli energiya tizimiga talab kuchaygan, bunday holat Sovet davridan beri kuzatilmagan.

“O‘tgan sutka davomida 76 million kilovatt/soat energiya iste’mol qilindi. Oxirgi bir necha kun ichida kechki soatlarda energiya tizimi mavjud quvvat doirasida ishlamoqda, buni isitish mavsumida qabul qilib bo‘lmaydi. Respublika bo‘ylab energetiklar GES va podstansiyalarda uskunaning xavfsiz ishlashini ta’minlash va favqulodda vaziyatlarning oldini olish maqsadida tun-u kun navbatchilik qilmoqda”, — deydi u.

Jakipov Qirg‘izistonda favqulodda energiya tizimini o‘chirib qo‘yish bo‘lmaganini ham qo‘shimcha qildi.

Avvalroq Osiyo taraqqiyot banki (OTB) CAREC (Markaziy Osiyo Mintaqaviy Iqtisodiy Hamkorligi) “Energetika istiqboli 2030” hisobotida yaqin yetti yil ichida Markaziy Osiyoda elektr energiyasiga talab 30 foizga oshishi prognoz qilingandi. Hisobotda Markaziy Osiyo va Kavkaz mamlakatlari, shuningdek, ularga qo‘shni bo‘lgan Mo‘g‘uliston, Pokiston va Xitoyga e’tibor qaratilgan.