Buxoro shahri qoq markazida 2023-yilda turizm markazi qurilishi rejalashtirilgan bo‘lib, buning uchun shaharning Ibrohim Mo‘minov va Mustaqillik ko‘chalari o‘qi atrofidagi barcha bino va inshootlar buziladi. Jumladan, katta sport majmuasi ham. Markaz 33 gektar maydonda quriladi. Ushbu maqsadlar uchun Buxoro viloyati budjetidan 2023-yilda 517 milliard so‘m ajratilishi ko‘zda tutilgan. Buxoroliklar 13-yanvar kuni markaz qurilishidan norozi bo‘lib, prezidentga murojaat yo‘llagan.
Holat yuzasidan qurilish va uy-joy kommunal xo‘jaligi vaziri Botir Zokirov “Daryo” muxbiriga bergan qisqacha interyusida bunga izoh berdi.
Markazning loyiha taklifi bo‘lgach, jamoatchilikka muhokama uchun qo‘yiladi. Buxoro shahrida aholi uchun alohida taqdimot qilib beriladi. Ayni vaqtda o‘rganish ishlari olib borilmoqda, xolos. Bu degani ertadan buzilish boshlanadi degani emas, hali oxirgi nuqta qo‘yilganicha yo‘q. Bu hozir loyiha taklifi, hali YUNESKO bilan kelishish bosqichi bor.
Hozir markaz tushadigan joyda xatlov ishlari olib borilmoqda. Ya’ni tartibga ko‘ra, u yerda qancha bino bor, kimga tegishli ekani haqida ma’lumot yig‘iladi. Agar markaz o‘rnida joylashgan bino va inshootlar buziladigan yoki boshqa joyga ko‘chiriladigan bo‘lsa, loyiha tanlovida yutgan tadbirkorlik subyekti tomonidan o‘rniga o‘rin qurib berish yoki o‘rnatilgan tartibda konpensatsiya to‘lib beriladi. Loyiha va qurilish ishlariga kamida ikki yil vaqt ketadi”, — deydi vazir.Bugun vazir boshchiligidagi ishchi guruh Buxoro shahrida markaz loyihasi yuzasidan OAV va aholi vakillariga tushuntirish berishi rejalashtirilgan. “Daryo” muxbiri voqea joyidan xabar berishda davom etadi.
Mavzuga doir: Qurilish vazirligi tomonidan 2022-yilda qanday ishlar amalga oshirildi?