“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 14-soni mavzusi “Ayolning gapi — gap” bo‘lib, dastur mehmoni sifatida jurnalist, “Anhor” internet nashri bosh muharriri Lola Islomova taklif etildi.
Lola Islomova o‘zbek oilasidagi ayolning o‘rni haqida gapirar ekan, mamlakatda jasur va matonatli ayollar ko‘pligiga to‘xtaldi.
— Bizda shunaqa gaplar bor: “Bu ayolning ishi, bu erkakning ishi emas, bolangni ol (go‘yo uning bolasi emas)”. Lekin yosh oilalarni kuzatib juda xursand bo‘laman, chunki hozirgi otalar bolasiga ko‘proq ahamiyat beradi, tarbiyasiga ko‘proq vaqt ajratadi. Avval otalar ko‘p ishlagan, ish qiyinroq bo‘lganmikan, balki.
Oilada ayollarga katta qo‘llab-quvvatlash kerak. Jannat onalar oyog‘i ostida, deyiladi. Lekin negadir bu gapni negadir onamiz keksayganda, bir nechta kasallikni orttirib olganda eslab qolamiz. Yosh ayollar ham ona-ku! Bizda ularni oyoqosti qilishadi, lekin betob bo‘lib, yoshi ulg‘ayganda hurmat ko‘rsata boshlashadi. Shuning uchun yoshi va jinsidan qat’i nazar har bir insonni hurmat qilish kerak.2018-yilda Zamonaviy jurnalistikani rivojlantirish markazini ochganmiz va viloyatlardagi jurnalist-blogerlar uchun muntazam treninglar o‘tamiz. Viloyatlarda turli insonlar bilan tanishishni juda yaxshi ko‘raman. O‘tgan yili 50 nafar ayoldan intervyu oldim, ularning orasida mexanizator, o‘qituvchidan tortib, yuqori lavozimda ishlaydiganlargacha bor edi. Bizda shunday ayollar borki, hayron bo‘lasiz. Masalan, Navoiyda bir ayol 69 nafar bola asrab olgan. Vodiylik bir ayol Umraga yig‘gan puliga ko‘prik qurgan.
Jurnalistlar go‘yoki projektor, kamchilikni ko‘rsatishi, muammoni yechishi kerak. Hozir aksariyat ommaviy axborot vositalari o‘ziga ko‘proq obunachi jalb qilish uchun aynan salbiy mazmundagi mavzularni yorityapti. Bizda sifatli jurnalistika, afsuski, juda kam. Jamiyatdagi muammolarnigina emas, shunday qahramon insonlarni ham auditoriyaga ko‘rsatish kerak, — deydi jurnalist.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)