Yunusobod tumanining ba’zi joylarida bir sutkadan buyon “svet” yo‘qligi aytilmoqda

“Daryo”ga kelib tushgan murojaatga ko‘ra, Toshkent shahridagi Yunusobod tumani 4-dahasida 12-yanvar soat 22:00 lardan boshlab elektr energiyasi ta’minotidan iste’molchilar uzilgan.

Bugun, 13-yanvar kuni bir necha bor shirkat bilan fuqarolar tomonidan Yunusobod tuman elektr ta’minoti korxonasiga borib murojaat qilingandan keyin avariya-tiklash brigadasi tomonidan soat 14:00 larda kelib ma’lum ish bajarilgan. Shundan keyin ushbu hududdagi bir qator iste’molchilar elektr ta’minoti tiklangan bo‘lsa-da, ushbu 7 ta uydagi xonadonning asosiy qismida elektr energiyasi ta’minlanmagan.

Aholi tomonidan elektr ta’minoti korxonasi ishonch telefoni (1055), Yunusobod tuman ETK dispetcheri (Shukrullo), Toshkent shahar ETK dispetcheri (Ravshan Xakkulov) murojaat qilingan bo‘lsa-da, muammo yechilmagan. Bundan tashqari, Yunusobod ETK rahbari, Toshkent shahar ETK qabulxonasi (71 233-75-79), Energetika vazirligi navbatchilik qismi ( 71 239-69-00) telefonlariga kun bo‘yi hech kim javob bermagan.

Holat yuzasidan “Hududiy elektr tarmoqlari” AJ Toshkent shahar filiali matbuot xizmatining ma’lum qilishicha, tezkor chiqish brigadalari tomonidan mazkur nosozlikni bartaraf etish choralari ko‘rilmoqda.

“Daryo” voqealar rivojini kuzatib boradi.