Toshkent shahrida 13-yanvar kuni Qo‘yliq bozoridan Do‘stlik-2 mavzesiga harakatlangan 117-sonli avtobus eshigi ochiq qoldirildi. “Toshshahartransxizmat” holat yuzasidan munosabat bildirdi.
Qayd etilishicha, avtobus harakatlanayotgan vaqtda bugungi kunda kuzatilayotgan anomal sovuq ob-havo harorati tufayli oraliq bekatda avtobus eshigining mexanizmidagi havo tizimi muzlab qolgan.
Haydovchi avtobus salonida yo‘lovchilar borligini inobatga olib, ularni oxirgi bekatga yetkazib qo‘yish maqsadida harakatni davom ettirgan. Yo‘lovchilarni bekatga yetkazgandan so‘ng haydovchi avtobusni 12-avtobus saroyi filialiga olib kirgan.
“Avtobusga texnik yordam ko‘rsatilib, kamchilik bartaraf etilgandan so‘ng soat 15:20 da yana yo‘nalishga chiqarilganligini va ushbu avtobus ayni paytda yo‘nalishda texnik soz holatda harakatini davom ettirayotganligini ma’lum qilamiz”, — deyiladi xabarda.
“Toshshahartransxizmat” tomonidan barcha avtobus saroyi mutasaddi rahbarlariga tegishli ko‘rsatmalar berilib, har shanba kuni bo‘lib o‘tadigan “Haydovchilar kuni” yig‘ilishida haydovchi va chiptachilarga favqulodda holatlar yuzaga kelgan vaqtda qanday harakatlanish zarurligi bo‘yicha yana bir bor tushuntirish ishlarini olib borish zarurligi to‘g‘risida topshiriqlar berilgan.
Izoh (0)