Европа комиссияси 2022 йилнинг учинчи чораги учун газ бозори ҳолати тўғрисидаги ҳисоботни эълон қилди.
Материалларга кўра, июлдан сентябргача Европа Иттифоқи газ импортига 101 миллиард еврога яқин маблағ сарфлаган, бу сўнгги ўн йилликдаги рекорд кўрсаткичдир. 2021 йилнинг худди шу давридаги харажатлар 29 миллиард еврони ташкил этганди.
Ҳисоботда қайд этилишича, учинчи чоракда Россия газ қувурлари импорти 2021 йилнинг шу даврига нисбатан 74 фоизга камайган.
Беларусь орқали етказиб беришнинг қисқариши 96 фоизни, Украина орқали — 63 фоизни, «Шимолий оқим 1» орқали — 85 фоизни ташкил этган. «Турк оқими» орқали газ етказиб бериш ҳажми 21 фоизга ошган.
Россиядан етказиб бериш кескин камайиб кетганига қарамай, учинчи чоракда Европа Иттифоқига суюлтирилган газ (СНГ) импорти 89 фоизга ошди ва 32 миллиард куб метрни ташкил этди.
АҚШдан LNG импорти ҳисобига етказиб бериш ҳажмини сақлаб қолиш мумкин эди. Ўтган йилнинг январидан ноябригача АҚШдан Европа Иттифоқига LNG етказиб бериш 52 миллиард куб метрни ташкил қилган.
ЕИда газ истеъмоли учинчи чоракда ўтган йилнинг шу даврига нисбатан 8 фоизга (-5,1 миллиард куб метр) камайиб, 59 миллиард куб метрни ташкил этди.
Шу билан бирга, ҳисоботда қайд этилишича, газ нархининг ошиши саноатнинг айрим тармоқларида талабнинг амалда пасайишига олиб келди.
Учинчи чоракда Европа Иттифоқининг жами газ импорти 2 фоизга ошди, ишлаб чиқариш эса 9 фоизга камайди.
Сентябрь ойида Европа Иттифоқидаги газ омборларини ўртача тўлдириш даражаси 89 фоизга етган, бу 2021 йилга нисбатан қарийб 14 фоизга юқори.
Европада январь ойининг ғайритабиий иссиқ бошланиши фонида қитъада газ нархи TTF индекси бўйича энг яқин фьючерсларда 1 МВт/соат учун 69 еврога тушиб кетди. Бу ўтган йилдаги энг паст кўрсаткич ва 2022 йил август ойидаги энг юқори газ нархидан беш баравар паст.
Изоҳ (0)