Yevropa Ittifoqi dori vositalarining strategik zaxirasini yaratishni va ishlab chiqaruvchilarni ularning yetkazib berilishini kafolatlashga majburlashni rejalashtirmoqda. Bu haqda The Financial Times xabar bermoqda.
Ittifoqda kasalliklarning ko‘payishi va Xitoydan eksportning qisqarishi penitsillin va paratsetamol kabi dori-darmonlar tanqisligiga olib keldi.
“Ayniqsa, bolalar uchun ba’zi markali dori-darmonlar, jumladan paratsetamol, antibiotiklar, shuningdek, ingalyatorlar yetishmovchiligi kuzatilmoqda”, — dedi Gretsiya sog‘liqni saqlash vaziri Tanos Pleuris.
Dori-darmon yetishmovchiligi deyarli barcha Yevropa Ittifoqining a’zo davlatlari va Buyuk Britaniya tomonidan qayd etilgan.
Yevrokomissiya hukumatlar bosimi ostida “tizimli sanoat siyosati” orqali muhim dori vositalari sohasida “strategik avtonomiya”ni ta’minlash maqsad qilgan.
Bryussel tez orada “barcha muhtoj bemorlar uchun dori vositalaridan foydalanish imkoniyatini ta’minlash va dori bozorida har qanday buzilishlarning oldini olish” qonunini taklif qiladi.
Yevropa Komissiyasi dori vositalarining yetishmasligini “ko‘p zaifliklarga ega tizimli muammo”, shu jumladan bir qator mamlakatlarga haddan tashqari ishonib qolish oqibati deb atadi.
Sog‘liqni saqlash bo‘yicha komissar Stella Kiriakidesning aytishicha, komissiya Yevropa Ittifoqi kompaniyalari bilan imkoniyatlarni oshirish uchun ishlamoqda.
“Sanoat bilan munozaralar allaqachon bo‘lib o‘tgan va ular ushbu dorilarni ishlab chiqarishni tezda ko‘paytirish kerakligini tushunadi”, — dedi u.
Izoh (0)