Forbes nashri o‘z biznesini ko‘chirishga qaror qilgan ayrim rossiyalik tadbirkorlar va hozirda boshqa mamlakatlarda ishlayotgan mutaxassislar bilan suhbatlashdi. Ulardan o‘zlari ko‘chib o‘tgan mamlakatlar haqida nimalarni bilgani va yangi yilda ushbu davlatlarda nimalar kutayotgani so‘ralgan.
Nashrga intervyu berganlar orasida Toshkentga ko‘chib kelgan rossiyalik mutaxassis ham bor. “Daryo” uning O‘zbekiston haqidagi taassurotlarini taqdim qiladi.
Denis Sokolov, Commonwealth Partnership Uzbekistan bosh direktori (sobiq Cushman & Wakefield)
“Mening O‘zbekistonga ko‘chib o‘tishim biroz farq qiladi. 2018-yildan boshlab biz Toshkentda loyihalarni amalga oshirmoqdamiz, 2020-yildan esa O‘zbekistonga ko‘chib o‘tish va u yerda ko‘chmas mulk bozorini rivojlantirish haqida o‘ylay boshladim. Professional nuqtayi nazardan, Toshkent tijorat ko‘chmas mulki uchun eng qiziqarli bozorlardan biri hisoblanadi. Bu shahar zamonaviy aktivlarni boshqarish va loyihalarni moliyalashtirish amaliyotiga juda muhtoj. Shuning uchun aytishimiz mumkinki, urush O‘zbekiston bozoriga to‘liq kirish qarorini faqat tezlashtirdi.
Iyul oyidan beri oilam bilan Toshkentda yashayman. Bolalar davlat maktabida o‘qiydi, xotinim mahalliy televideniyeda tibbiy ko‘rsatuv olib boradi. Moslashish oson kechdi va Toshkent kundalik nuqtayi nazardan juda qulay shaharga aylandi. Biz do‘stlar topishga muvaffaq bo‘lganimiz muhim va endi ijtimoiy doira nafaqat relokantlardan, balki mahalliy aholidan ham iborat. Bu sizga o‘zingizni jamiyatning bir qismi sifatida his qilish imkonini beradi.
Ko‘pchilik O‘zbekistondagi ishbilarmonlik muhiti ham, iqtisodiyoti ham 2004-yildagi Rossiyaga o‘xshashligini ta’kidlaydi. Biroq sezilarli farq bor: bu mamlakatda 90-yillar va jinoyatlar to‘lqini bo‘lmagan, shuning uchun biznesda ishonch elementi va obro‘-e’tibor institutining juda katta roli saqlanib qolgan.
Norasmiy kelishuvlar va va’dalar juda muhim. Buning salbiy tomoni ko‘pincha rasmiyatchilik sifatida qabul qilinadigan huquqiy hujjatlarga e’tiborning yetishmasligi. Bu shahar hayotida ham seziladi: do‘kon va idoralarda xavfsizlik yo‘q, yorug‘ do‘kon oynalari turmush darajasi past bo‘lishiga qaramay, kundalik jinoyat va buzg‘unchilik yo‘qligini aytadi.
Mahalliy nuqtayi nazardan, eng katta sinov — yetkazib berish xizmatlarining yomon rivojlangani. Men “xarid qilish” kabi eski amaliyotga qaytishimga to‘g‘ri keldi. Ammo uydagi barcha qiyinchiliklar arzon va samarali taksi xizmati bilan qoplanadi. Mashinalar uch daqiqada yetib keladi, shahar bo‘ylab sayohat o‘rtacha 10 ming so‘mga tushadi, bu bir dollarga ham yetmaydi.
Umid qilamanki, yangi yilda hamkasblarim bilan olib borayotgan sa’y-harakatlarimiz o‘z samarasini beradi va biz faxrlansa bo‘ladigan muhim bitimlarni tashkil eta olamiz. Kelgusi yilda bolalarim o‘zbek tilini yaxshiroq tushunishiga umid qilaman.
Commonwealth Partnership Uzbekistan — ko‘chmas mulk sohasidagi konsalting, investitsiya va agentlik xizmatlarini ko‘rsatuvchi va Commonwealth Partnership [CMWP™] nomi ostida faoliyat yurituvchi xalqaro kompaniyalar guruhi tarkibiga kiradi.
Kompaniya 28 yildan ortiq vaqtdan beri faoliyat yuritib, MDH mamlakatlari va boshqa rivojlanayotgan bozorlarda xizmat ko‘rsatib kelmoqda. 2022-yilning apreligacha kompaniya Cushman & Wakefield global guruhining bir qismi edi.
2018-yildan beri O‘zbekiston bozoridagi loyihalar ustida ishlamoqda. Ayni paytda Toshkentda kompaniya ofisi ochilgan.
Izoh (0)