Европа Иттифоқи дори воситаларининг стратегик захирасини яратишни ва ишлаб чиқарувчиларни уларнинг етказиб берилишини кафолатлашга мажбурлашни режалаштирмоқда. Бу ҳақда The Financial Times хабар бермоқда.
Иттифоқда касалликларнинг кўпайиши ва Хитойдан экспортнинг қисқариши пенициллин ва парацетамол каби дори-дармонлар танқислигига олиб келди.
«Айниқса, болалар учун баъзи маркали дори-дармонлар, жумладан парацетамол, антибиотиклар, шунингдек, ингаляторлар етишмовчилиги кузатилмоқда», — деди Греция соғлиқни сақлаш вазири Танос Плеурис.
Дори-дармон етишмовчилиги деярли барча Европа Иттифоқининг аъзо давлатлари ва Буюк Британия томонидан қайд этилган.
Еврокомиссия ҳукуматлар босими остида «тизимли саноат сиёсати» орқали муҳим дори воситалари соҳасида «стратегик автономия»ни таъминлаш мақсад қилган.
Брюссель тез орада «барча муҳтож беморлар учун дори воситаларидан фойдаланиш имкониятини таъминлаш ва дори бозорида ҳар қандай бузилишларнинг олдини олиш» қонунини таклиф қилади.
Европа Комиссияси дори воситаларининг етишмаслигини «кўп заифликларга эга тизимли муаммо», шу жумладан бир қатор мамлакатларга ҳаддан ташқари ишониб қолиш оқибати деб атади.
Соғлиқни сақлаш бўйича комиссар Стелла Кириакидеснинг айтишича, комиссия Европа Иттифоқи компаниялари билан имкониятларни ошириш учун ишламоқда.
«Саноат билан мунозаралар аллақачон бўлиб ўтган ва улар ушбу дориларни ишлаб чиқаришни тезда кўпайтириш кераклигини тушунади», — деди у.
Изоҳ (0)