Швециянинг Стокгольм мэрияси олдида курд фаоллари томонидан Туркия президенти Ражаб Тоййиб Эрдўғонга ўхшаш қўғирчоқ тескари осилиб кетилди. Бу ҳақда Reuters хабар берди.
Ҳолат юзасидан Анқара Швецияни терроризмга қарши курашиш ва ўз ҳудудида Туркияга қарши ҳаракатларни олдини олиш бўйича ўз мажбуриятларини бузганликда айблади. «Осилган қўғирчоқ» Рожава қўмиталари (Суриянинг Рожава шаҳри номи билан аталган) «бутун Курдистон бўйлаб инқилобий ҳаракат билан бирдамлик ва ҳамкорлик тармоғи» томонидан амалга оширилган. Туркия матбуоти уларни Курдистон ишчилар партияси тарафдорлари деб эълон қилган.
Ташкилот Эрдўғоннинг «осилгани» акс этган видеони ўзининг Twitter’даги саҳифасига қуйидаги матн билан бирга юклаган:
«Тарих диктаторлар қанчалик тез-тез тугашини кўрсатади, шу учун ҳамманинг манфаати инобатга олиб, Тақсим майдонида тескари ‘осилмаслик’ учун, Эрдўғон, истеъфога чиқинг!», — дейилади видео изоҳида.
«Осилган қўғирчоқ» Туркиянинг ғазабини қўзғатиш ва Швецияни НАТОга қўшилишдан тўхтатиш учун қилинган провокация бўлиши мумкин. Видеога илова қилинган матнда Рожава қўмиталари «Биз НАТОга йўқ деймиз! Фашистлар билан иттифоқ бўлмайди!" деб ёзади.
Эрдўғоннинг матбуот котиби Фаҳреттин Алтун Туркия президенти ҳақоратланишига муносабат билдирган.
«Бу Швеция расмийлари сўнгги пайтларда даъво қилганидек терроризмга қарши керакли чораларни кўрмаганининг исботи», — деган у ва Швеция НАТОга аъзо бўлиш учун ўз ваъдаларини бажариши кераклигини билдирган.
«Осилган қўғирчоқ» сабабли Швециянинг Анқарадаги элчиси Стаффан Хёрстрём Туркия Ташқи ишлар вазирлигига чақиртирилган. Суҳбат давомида воқеа юзасидан кескин норозилик билдирилиб, нота топширилган. Туркия Швеция парламенти спикерининг мамлакатга режалаштирилган ташрифини бекор қилган. Туркия президенти Ражаб Тоййиб Эрдўғоннинг адвокатлари Стокгольмдаги провокация юзасидан Анқара Республика судига мурожаат қилган.
Изоҳ (0)