Rossiyaning Kuban viloyatida “Vagner” xususiy harbiy kompaniyasining yollanma askarlari qabristoni topildi. Bu haqda Sota Telegram kanaliga tayanib, UNIAN xabar berdi.
Ma’lum qilinishicha, qabriston begona ko‘zlardan yashiringan. Urushda halok bo‘lgan askarlar yopiq hududga dafn etilgan. Qabristonda yuzdan ortiq qabr bor, ularning soni deyarli har kuni ortib bormoqda.
“Vagnerchilar”ning barcha qabrlari o‘rtasidagi xarakterli farq fotosuratlar yo‘qligidan iborat.
Eslatib o‘tamiz, Lugansk viloyatida “Vagner” xususiy harbiy kompaniyasi o‘quv markazidan olti nafar mahbus qochib ketgan bo‘lib, ular orasida o‘zbekistonliklar ham bor. Yollanma jangchilar jangovar harakatlar zonasiga ketishi kerak bo‘lgan paytda qochib ketgan. “Vagner” guruhi rahbari Prigojin ular haqida “barcha zarur axborot” borligini aytgan.
Ukrainadagi urushda qatnashayotgan Vagner jangchilarining taxminan 90 foizi mahbuslar bo‘lishi mumkin. Ukrainadagi “vagnerchilar”ning umumiy soni 50 ming kishiga yetishi, ulardan 40 mingga yaqini mahbuslar bo‘lishi aytiilgan. So‘nggi haftalarda Ukrainada mingga yaqin “Vagner” jangchilari o‘ldirilgan, ularning 90 foizi sobiq mahbuslar bo’lgan.
Rossiya qamoqxonalaridagi mahbuslarni Ukrainadagi urushda qatnashish uchun yollash 2022-yilning yozida ma’lum bo‘ldi. Vagner guruhi asoschisi Yevgeniy Prigojin shaxsan o‘zi ba’zi koloniyalarga mahbuslarni yollash maqsadida borgan. Bu haqda 21-dekabr kuni Vladimirdagi qattiq tartibli koloniyada jazo o‘tayotgan siyosatchi Aleksey Navalniy ham aytgan.
Avvalroq Rossiyaning Sverdlovsk viloyatida deputat Vyacheslav Vegner ayol mahbuslarni Ukrainadagi urushga yuborishni taklif qilgandi. “Vagner” xususiy harbiy kompaniyasi rahbari Yevgeniy Prigojin deputatning taklifini qo‘llab-quvvatlagan.
Izoh (0)