1964—1974-yillarda hukmronlik qilgan Gretsiyaning so‘nggi qiroli Konstantin II 82 yoshida vafot etdi, deb xabar bermoqda Newsbomb portali.
Qayd etilishicha, sobiq qirol so‘nggi bir hafta davomida og‘ir ahvolda kasalxonada yotgan. Uning yonida rafiqasi Anna-Mariya, farzandlari va boshqa qarindoshlari bo‘lgan. Konstantin undan avvalroq insultni boshidan kechirgan. Proto Tema gazetasi ma’lumotlariga ko‘ra, uning o‘limiga poliorgan yetishmovchiligi sabab bo‘lgan, bunday holatda organizmning bir yo‘la bir nechta tizimlariga zarar yetadi.
Glyuksburglar sulolasi vakili Konstantin 1940-yil 2-iyun kuni tug‘ilgan. U qirol Pavel I va qirolicha Frederika Gannoverning o‘g‘li bo‘lgan.
1964-yilda Konstantin dastlab otasi qoshida regent bo‘lgan, uning o‘limidan keyin esa taxtga o‘tirgan. Newsbomb ta’kidlashicha, yosh qirol o‘z onasining kuchli ta’siri ostida bo‘lgan.
Konstantin hukmronligi davriga Gretsiyadagi siyosiy inqiroz to‘g‘ri keldi, keyinroq u 1967-yilgi harbiy to‘ntarishga aylanib ketdi, natijada esa mamlakatda polkovniklar xuntasi diktaturasi o‘rnatildi, uning yetakchisi esa Georgios Papadopulos edi. O‘sha yil oxirida Konstantin xuntaga qarshi chiqishga urindi, biroq bu muvaffaqiyatsiz bo‘ldi, natijada u Gretsiyani tark etishga majbur bo‘ldi. Shundan keyin u Italiya va Buyuk Britaniyada yashadi.
1974-yilda Turkiyaning Kiprdagi jangovar harakatlari fonida diktatura quladi. Gretsiyada o‘sha yiliyoq referendum o‘tkazildi, unda aholining 69,2 foizi mamlakatda boshqaruvning monarxiya emas, respublika shakli o‘rnatilishini yoqlab ovoz berdi. Konstantin xalq xohish-irodasini qabul qildi. 1967-yilda mamlakatni tark etganidan buyon birinchi marta 1981-yildagina qaytib keldi.
1992-yilda sobiq qirol mol-mulkidan va Gretsiya fuqaroligidan mahrum etildi, shundan keyin u Gretsiyani sudga berdi. Oxir-oqibat o‘n yildan keyin Yevropa sudi Konstantin foydasiga 13,7 million yevro undirib berdi, ammo u 161 million yevro talab qilgandi.
Gretsiyaning so‘nggi qiroli Britaniya qiroli Charlz III ning va Rossiya imperatori Nikolay I ning o‘g‘li Konstantinning qarindoshi bo‘lgan. Sobiq qirolning rafiqasi Anna-Mariya — Daniya hukmron qirolichasi Margrete II ning singlisi. Konstantinning besh nafar farzandi bor.
Izoh (0)