O‘zbekiston elchixonasi vakillari amaliy safar bilan Janubiy Koreyaning Changvon shahrida (Kyonsannam-do provinsiyasi) bo‘ldi, deb xabar bermoqda “Dunyo” axborot agentligi.
Qayd etilishicha, safar doirasida Kyonsannam-do provinsiyasi gubernatori o‘rinbosari, xalqaro aloqalar elchisi Kim Byung Yun bilan uchrashuv bo‘lib o‘tgan. Muloqot chog‘ida ikki davlat hududlari o‘rtasida sanoat, savdo-iqtisodiy va madaniy-gumanitar, ta’lim va turizm sohalarida o‘zaro manfaatli hamkorlikni kengaytirish hamda rivojlantirish istiqbollari yuzasidan atroflicha fikr almashilgan.
Elchi Kim Byung Yun Kyonsannam-do provinsiyasi O‘zbekiston hududlari bilan hamkorlikni yo‘lga qo‘yishdan manfaatdor ekanini ta’kidlagan. Hudud korxonalari bilan yaqindan tanishish uchun Janubiy Koreya tomoni o‘zbekistonlik mutaxassislarni Kyonsannamdo provinsiyasiga taklif qilgan.
Janubiy Koreya tomoni 2023-yil yozida Kyonsannam-do provinsiyasida o‘tkazilishi rejalashtirilgan xalqaro choy ko‘rgazmasi haqida ham ma’lumot bergan. O‘zbekistonning yetakchi choy ishlab chiqaruvchilarini ushbu ko‘rgazmada ishtirok etishga chaqirgan.
Changvon katta salohiyat va imkoniyatlarga ega ekanini inobatga olib, ikki mamlakat hududlari o‘rtasida to‘g‘ridan-to‘g‘ri sayyohlik almashuvini tashkil etish, qo‘shma dastur va loyihalarni, jumladan, madaniy-gumanitar sohada amalga oshirishga ko‘maklashish yuzasidan kelishuvga erishilgan.
Izoh (0)