Andijon viloyati Xo‘jaobod tumanida yer maydoni olib berishni va’da qilgan iqtisodchi ushlandi, deb xabar bermoqda Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departamentning Xo‘jaobod tuman bo‘limi tomonidan tezkor tadbir o‘tkazilgan. Unda Andijon viloyati uy-joy kommunal xo‘jaligi bosh boshqarmasi huzuridagi ishlab chiqarish boshqarmasi iqtisodchisi M.K. fuqaro J.M.ga Andijon shahar Toshkent ko‘chasidagi qurilishi tugallanmagan binoning 4 sotix yer maydonini onlayn-auksion orqali olib berish va kadastr hujjatlarini tayyorlab berishini aytgani aniqlangan.
U xizmati evaziga 20 000 dollarni firibgarlik yo‘li bilan qo‘lga kiritib, ushbu pullar hisobidan 400 dollarni Xo‘jaobod tumanidagi avtomobil bozori yonida qaytarib bergan vaqtida ashyoviy dalillar bilan qo‘lga tushgan.
Holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Izoh (0)