Joriy yil 1-yanvar kuni tongda Namangan viloyatining Kosonsoy tumanidagi xonadonlardan birida yong‘in sodir bo‘lgan va ushbu uyda yashagan 28 yashar yigit hamda uning 27 yoshli rafiqasi jasadlari kuyish alomatlari bilan topilgandi. Bu haqda “Daryo” muxbiri Azizbek Abduvaliyev xabar bermoqda.
Shu kunning o‘zida viloyat prokuraturasi tomonidan holat yuzasidan Jinoyat kodeksining 97-moddasi 2-qismi “a” bandi bilan jinoyat ishi qo‘zg‘atilgan.
Jinoyat ishi bo‘yicha o‘tkazilgan dastlabki tergov harakatlari davomida marhum o‘zining tanishidan AQSHga borish uchun viza qilib berish evaziga 15 ming dollar olib, uni aldab, pullarni qaytarmaganligi ma’lum bo‘lgan.
Shundan so‘ng tezkor-qidiruv tadbirlari davom ettirilib, marhumning tanishi va uning turmush o‘rtog‘i ushlanib, ehtiyot chorasi sifatida qamoqqa olingan.
6-yanvar kuni viloyat hokimi Shavkat Abdurazzaqov va huquq-tartibot idoralari mutasaddilari ishtirokida Kosonsoy tumanida ushbu jinoyat yuzasidan muhokama yig‘ilishi o‘tkazildi. Yig‘ilishda bunday holatlarning oqibatlari emas, balki ularga yo‘l ochgan omillarga qarshi kurashish haqida so‘z bordi.
Izoh (0)