Жорий йил 1 январь куни тонгда Наманган вилоятининг Косонсой туманидаги хонадонлардан бирида ёнғин содир бўлган ва ушбу уйда яшаган 28 яшар йигит ҳамда унинг 27 ёшли рафиқаси жасадлари куйиш аломатлари билан топилганди. Бу ҳақда «Дарё» мухбири Азизбек Абдувалиев хабар бермоқда.
Шу куннинг ўзида вилоят прокуратураси томонидан ҳолат юзасидан Жиноят кодексининг 97-моддаси 2-қисми «а» банди билан жиноят иши қўзғатилган.
Жиноят иши бўйича ўтказилган дастлабки тергов ҳаракатлари давомида марҳум ўзининг танишидан АҚШга бориш учун виза қилиб бериш эвазига 15 минг доллар олиб, уни алдаб, пулларни қайтармаганлиги маълум бўлган.
Шундан сўнг тезкор-қидирув тадбирлари давом эттирилиб, марҳумнинг таниши ва унинг турмуш ўртоғи ушланиб, эҳтиёт чораси сифатида қамоққа олинган.
6 январь куни вилоят ҳокими Шавкат Абдураззақов ва ҳуқуқ-тартибот идоралари мутасаддилари иштирокида Косонсой туманида ушбу жиноят юзасидан муҳокама йиғилиши ўтказилди. Йиғилишда бундай ҳолатларнинг оқибатлари эмас, балки уларга йўл очган омилларга қарши курашиш ҳақида сўз борди.
Изоҳ (0)