Yevropada narxlar o‘sishi ketma-ket ikkinchi oy pasaymoqda

2022-yil dekabr oyida Yevropada inflyatsiya darajasi 9,2 foizga tushdi. Bu haqda Eurostat’ning dastlabki hisob-kitoblaridan ma’lum bo‘ldi. 

Mazkur ko‘rsatkich sentabr oyidan beri eng past bo‘lib, noyabr oyida Yevropa Ittifoqida inflyatsiya darajasi 10,1 foizga yetgan edi.

Eurostat shuningdek, Yevropada energiya narxi o‘sishining sekinlashishini qayd etdi: noyabrdagi 34,9 foizdan dekabrda 25,7 foizgacha. 

Oziq-ovqat, alkogol va tamaki mahsulotlari narxining oshishi kuzatilmoqda (noyabrdagi 13,6 foizdan dekabrdagi 13,8 foizgacha). 

Boshqa iste’mol tovarlari narxlari dekabr oyida yillik ko‘rsatkichda 5,2 foizga oshdi — noyabr oyiga nisbatan iste’mol narxlari o‘tgan oyda 0,3 foizga pasaygan.

Yevropa Markaziy bankining (ECB) inflyatsiya maqsadi 2 foiz hisoblanadi. 15-dekabrda bank o‘zining bazaviy stavkasini ketma-ket to‘rtinchi marta 2,5 foizgacha oshirgandi.

Avvalroq Yevropa aholisi elektr va gaz uchun rekord darajada ko‘p pul to‘layotgani haqida xabar berilgan edi.