O‘zbekiston noyabrda dunyo bo‘ylab eng ko‘p oltin sotgan davlatlardan biri bo‘ldi

Dunyo bo‘ylab Markaziy banklar noyabr oyida oltin zaxiralarini 50 tonnaga oshirdi. Bu haqda Jahon oltin kengashi xabar bermoqda. 

Mazkur ko‘rsatkich oktabr oyidagi 34 tonnaga nisbatan 47 foizga ko‘pdir. Noyabr oyida birgina Xitoy Xalq banki 32 tonna oltin sotib olganini e’lon qildi va mutlaq yetakchi bo‘ldi. 

Bank 2019-yilning sentabr oyidan beri oltin zaxiralari o‘sishini birinchi marta e’lon qildi. Bu e’lon Xitoyning 2002—2019-yillarda 1448 tonna oltin to‘plagan yirik oltin xaridori sifatidagi tarixiy mavqeyini hisobga olgan holda muhim ahamiyatga ega. Noyabr oyi oxirida Xitoy Xalq banki oltin zaxiralari 1 980 tonnani tashkil etgan (umumiy zaxiralarning 3,4 foizi).

Noyabr oyida Turkiya Markaziy banki oltin sotib olishni davom ettirdi va o‘zining rasmiy (markaziy bank va G‘aznachilik) zaxiralariga yana 19 million dollar qo‘shib, 517 tonnagacha yetkazdi (umumiy zaxiralarning 27 foizi). 

Qirg‘iziston Markaziy banki bu yil birinchi marta 3 tonna oltin sotib olib, jami oltin zaxiralarini 16 tonnaga ko‘paytirdi.

Oltin sotish bo‘yicha O‘zbekiston Markaziy banki va Qozog‘iston Milliy banki yetakchilik qilmoqda. 

Qozog‘iston o‘zining oltin zaxiralarini taxminan 4 tonnaga kamaytirib, 380 tonnaga (yillik yillik -5 foiz) tushirdi. 

O‘zbekistonning oltin zaxiralari esa noyabr oyida deyarli 2 tonnaga kamayib, 397 tonnani tashkil qilgan.

O‘zbekiston noyabr oyida oltin sotganini Davlat statistika qo‘mitasi ham tasdiqlagan edi. 

Noyabrda O‘zbekiston yetti oydan beri birinchi marta 556,7 mln dollarlik oltin eksport qilgan. Mamlakat so‘nggi bor mart oyida ushbu qimmatbaho metallni eksport qilgan edi.

O‘zbekiston nega oltin sotmoqda?

Global oltin narxlari mart oyida 2 050 dollar atrofida shakllangan edi. Biroq geosiyosiy vaziyat oqibatida narxlar yil davomida 1 650 dollardan ham tushib ketdi.

Bu holatda O‘zbekiston ko‘proq oltin sotib ola boshladi va qimmatbaho metallni xarid qilish bo‘yicha jahonda yetakchilardan biriga aylandi.

“Biz uchun ikkita omil bor: joriy narx va kelajakdagi narx. Narx ko‘tarilmoqdami yoki u o‘zining eng yuqori cho‘qqisiga yetib, pasayyaptimi? Bu biz izlayotgan daqiqa. Agar narx ko‘tarilayotgan bo‘lsa, kutganimiz ma’qul”, — degan edi O‘zbekiston Markaziy banki raisi o‘rinbosari Behzod Hamroyev.

Noyabr oyiga kelib vaziyat birmuncha yaxshilandi va jahonda oltin narxlari 1 800 dollargacha ko‘tarildi. Ayni shu davrdan boshlab O‘zbekiston yana oltin sotishni boshlagan.