Ўзбекистон ноябрда дунё бўйлаб энг кўп олтин сотган давлатлардан бири бўлди

Дунё бўйлаб Марказий банклар ноябрь ойида олтин захираларини 50 тоннага оширди. Бу ҳақда Жаҳон олтин кенгаши хабар бермоқда. 

Мазкур кўрсаткич октябрь ойидаги 34 тоннага нисбатан 47 фоизга кўпдир. Ноябрь ойида биргина Хитой Халқ банки 32 тонна олтин сотиб олганини эълон қилди ва мутлақ етакчи бўлди. 

Банк 2019 йилнинг сентябрь ойидан бери олтин захиралари ўсишини биринчи марта эълон қилди. Бу эълон Хитойнинг 2002—2019 йилларда 1448 тонна олтин тўплаган йирик олтин харидори сифатидаги тарихий мавқейини ҳисобга олган ҳолда муҳим аҳамиятга эга. Ноябрь ойи охирида Хитой Халқ банки олтин захиралари 1 980 тоннани ташкил этган (умумий захираларнинг 3,4 фоизи).

Ноябрь ойида Туркия Марказий банки олтин сотиб олишни давом эттирди ва ўзининг расмий (марказий банк ва Ғазначилик) захираларига яна 19 миллион доллар қўшиб, 517 тоннагача етказди (умумий захираларнинг 27 фоизи). 

Қирғизистон Марказий банки бу йил биринчи марта 3 тонна олтин сотиб олиб, жами олтин захираларини 16 тоннага кўпайтирди.

Олтин сотиш бўйича Ўзбекистон Марказий банки ва Қозоғистон Миллий банки етакчилик қилмоқда. 

Қозоғистон ўзининг олтин захираларини тахминан 4 тоннага камайтириб, 380 тоннага (йиллик йиллик -5 фоиз) туширди. 

Ўзбекистоннинг олтин захиралари эса ноябрь ойида деярли 2 тоннага камайиб, 397 тоннани ташкил қилган.

Ўзбекистон ноябрь ойида олтин сотганини Давлат статистика қўмитаси ҳам тасдиқлаган эди. 

Ноябрда Ўзбекистон етти ойдан бери биринчи марта 556,7 млн долларлик олтин экспорт қилган. Мамлакат сўнгги бор март ойида ушбу қимматбаҳо металлни экспорт қилган эди.

Ўзбекистон нега олтин сотмоқда?

Глобал олтин нархлари март ойида 2 050 доллар атрофида шаклланган эди. Бироқ геосиёсий вазият оқибатида нархлар йил давомида 1 650 доллардан ҳам тушиб кетди.

Бу ҳолатда Ўзбекистон кўпроқ олтин сотиб ола бошлади ва қимматбаҳо металлни харид қилиш бўйича жаҳонда етакчилардан бирига айланди.

«Биз учун иккита омил бор: жорий нарх ва келажакдаги нарх. Нарх кўтарилмоқдами ёки у ўзининг энг юқори чўққисига етиб, пасайяптими? Бу биз излаётган дақиқа. Агар нарх кўтарилаётган бўлса, кутганимиз маъқул», — деган эди Ўзбекистон Марказий банки раиси ўринбосари Беҳзод Ҳамроев.

Ноябрь ойига келиб вазият бирмунча яхшиланди ва жаҳонда олтин нархлари 1 800 долларгача кўтарилди. Айни шу даврдан бошлаб Ўзбекистон яна олтин сотишни бошлаган.