McDonald’s Қозоғистонни тарк этиш арафасида, чунки таъминот занжиридаги узилиш туфайли мамлакатдаги ресторанлар Россиядан гўшт сотиб ололмаяпти. Бу ҳақда Bloomberg хабар бермоқда.
Унинг манбаларига кўра, McDonald’s Украинада уруш бошланиши муносабати билан Россияни тарк этишга қарор қилгандан сўнг, Америка компанияси қозоғистонлик франчайзига россиялик етказиб берувчилардан қийма сотиб олишни тақиқлаган.
2022 йилнинг ноябрида тармоқнинг барча 24 та ресторани «маҳаллий етказиб беришдаги» чекловлар туфайли Қозоғистонда ўз фаолиятини тўхтатди.
Декабрь ойида Қозоғистон Миллий тадбиркорлар палатаси Atameken маҳаллий ишлаб чиқарувчилар ўз маҳсулотларини McDonald’sга етказиб беришга тайёрлигини маълум қилди.
«Компаниямиз йирик иш берувчи бўлиб, Қозоғистон бозорига нисбатан яқинда кириб келган брендни янада ривожлантирмоқчимиз. Ҳозирги геосиёсий вазиятлар бизга таъсир қилади, чунки биз халқаро брендмиз.
Шу боис бизнинг мақсадимиз фаолиятимизни барча талаб ва тартибларга мувофиқ давом эттириш ва янада ривожлантиришдир», — деди «Food Solutions КZ» (McDonald’s Қозоғистон) бош директори Ассет Машанов.
McDonald’s Қозоғистонда 2016 йилдан бошлаб фаолият юритган. 2022 йил баҳори ҳолатига кўра, мамлакатнинг олтита шаҳрида 24 та ресторан очган.
Bloomberg маълумотларига кўра, собиқ президент Нурсултон Назарбоевнинг қариндоши Қайрат Бўранбаев 2016 йилда Қозоғистонга фаст-фуд тармоғини олиб келган. Бўранбаев «КазРосГаз» собиқ бош директори сифатида ҳам таниқли.
У, шунингдек, Беларусдаги McDonald’s франчайзасига эгалик қилган ва ўтган йили таъминот билан боғлиқ муаммолар туфайли лицензиясидан маҳрум бўлган.
Таъкидланишича, компаниянинг айни пайтдаги вазияти Қайрат Бўранбоевнинг мамлакатда квазидавлат секторида катта ҳажмдаги маблағларни ўзлаштириш иши бўйича суд қилинаётгани билан мураккаблашмоқда.
Изоҳ (0)