«Толибон» ҳаракати Дуранд чизиғи бўйлаб йўл ётқизди

«Толибон» ҳаракати Дуранд чизиғи бўйлаб йўл ётқизишни якунлади. Бу ҳақда Спутник хабар берди.

Ноябрь ойида айнан шу йўлнинг ётқизилиши сабабли Покистон ва «Толибон» чегарачилари ўртасида тўқнашув бўлган. «Толибон» ОАВ фаолларининг хабар беришича, йўл ётқизиш якунлангач ишчилар ва техника хавфсизлигини таъминлаган жангчилар 203-«Мансурий» армия корпусининг мунтазам жойлашиш пунктларига қайтган.

11 декабрда «Толибон» чегара кучлари Дуранд линияси яқинида янги пост қуришни режалаштирганидан кейин Покистон чегарачилари билан тўқнашув бошланган. Ҳодиса оқибатида «Толибон»нинг бир аъзоси ҳалок бўлган, 10 нафари эса яраланганди. Покистон томони эса жангда бир аскар жароҳат олганини хабар қилган.

Орадан тўрт кун ўтиб, 15 декабрда «Толибон» Дуранд чизиғида пост ўрнатмоқчи бўлганида Покистон ҳарбийлари билан отишма бўлган. Оқибатда бир нафар тинч фуқаро ҳалок бўлган, 15 киши эса яраланган. Покистон чегарага ҳужумчи вертолётлар юборган ва Кобулдаги элчихона ходимларини эвакуация қилган. Томонлар ҳодисада бир бирини айблаган.

«Толибон» матбуот котиби Забиҳуллоҳ Мужоҳид 15 декабрь куни чегарадаги можаро Покистон ҳарбийлари томонидан бошланганини маълум қилган. Покистон сенатори эса «Толибон» ҳаракати раҳмат ўрнига «қурол билан жавоб беришганини» айтган. Сиёсатчи Афғонистон билан чегарадаги можаролар сони Ҳиндистон билан шарқий чегарадагига қараганда охирги пайтларда анча кўпайгани, мамлакат «Толибон»га нисбатан сиёсатини қайта кўриб чиқиши кераклигини таъкидлаган.

Мавзуга доир: «Толибон» чегарадаги вазият бўйича Покистонни огоҳлантирди