Kaliforniya shimolida Tesla Model Y avtomobili 75 metr balandlikdagi jardan qulab tushdi — bu 25 qavatli binodan qulaganday gap, deydi Fox 2 San Fransisco muxbirlari.
Baxtsiz hodisa San-Fransisko yaqinidagi Devils Slayd qoyali hududda yuz bergan. Tesla elektromobili boshqaruvni yo‘qotib, yo‘ldan chiqib ketgan va jarga qulagan. Mashinada ikki katta yoshli kishi hamda yana ikki 4 va 9 yoshli bolalar bo‘lgan — ularning barchasi omon qolgan.
Tesla Model Y suvgacha yetib bormagan, ammo toshlarga kuchli zarb bilan urilib, mashina bir uyum metallga aylangan. Shunga qaramay elektrokar haydovchi va yo‘lovchilarni himoya qila olgan.
Hodisa ishtirokchilarini evakuatsiya qilish uchun vertolyot kerak bo‘lgan, qutqaruvchilar esa toqqa chiqish uchun asbob-uskunalardan foydalanishga majbur bo‘lgan. Vaziyat murakkab ob-havo sharoiti — yomg‘ir va kuchli shamol tufayli yanada og‘irlashgan. Haydovchi va yo‘lovchilar kasalxonaga yotqizilgan, biroq ko‘p o‘tmay bolalarga uyga javob berilgan, chunki ular juda mayda jarohatlar olgan.
Qutqaruvchilarning qayd etishicha, bu hududdagi birinchi baxtsiz hodisa emas. Ilgari ham Devils Slaydda avtomobillar bir necha bor qoyadan qulagan, ammo shu paytgacha odamlar omon qolishga muvaffaq bo‘lmagan.
Tesla Model Y elektromobili bozordagi eng xavfsiz avtomobillardan biri hisoblanadi. Model barcha avariya sinovlarida yuqori baho olgan.
Ayni paytda politsiya haydovchini hibsga olmoqchi: u o‘z joniga qasd qilib, butun oilasini ham o‘ldirmoqchi bo‘lgan, shuning uchun ataylab jarlikka haydagan, degan gumonlar bor.
Izoh (0)