2023 йил соғлиқни сақлаш тизимида «Коррупцияга қарши кураш йили» бўлади. Бу ҳақда бугун (4 январь) бўлиб ўтган ҳайъат йиғилиши соғлиқни сақлаш вазири Амрилло Иноятов айтиб ўтди.
Вазирлик ахборот хизмати хабарига кўра, Амрилло Иноятов жорий йилда тизимда коррупцияга қарши курашиш кучайтирилишини таъкидлаган.
«Кўпчиликка маълум бўлган коррупция урчиган бир қатор йўналишлар борки, биринчи навбатда уларга барҳам беришимиз керак. Хусусан, ишга жойлаштириш, айниқса ҳамшираларни, роддомлардаги «суюнчи пули», «кесарча кесиш» учун белгиланган ставкалар, ордер беришдаги таниш-билишчилик каби иллатлар мавжудлигини ҳамма билади.
Афсуски, шу ишларни амалга ошираётган айрим нопок шахслар туфайли бутун тизим шаънига доғ тушмоқда. Янги йилни тизимда «Коррупцияга қарши кураш йили» деб эълон қиламиз. Вазирликнинг махсус «Ишонч телефони» ташкил этилади. Шу билан бирга ишонч телефони сифатида ўзимнинг шахсий рақамимни ҳам киритаман», – деган у.
Шу билан бирга, мажлисда малака тоифасини беришда инсон омили аралашмайдиган, шаффоф, уч босқичли янги тизим жорий этилиши айтилган.
«Таълим йўналишидаги бюрократик тўсиқларга барҳам берилади. Жумладан, методик қўлланмалар, монографиялар, услубий қўлланмалар, илмий ишларга хулосалар беришни вазирлик томонидан тасдиқлаш тизими бекор қилиниб, барча ваколатлар эндиликда ОТМлар ва ихтисослаштирилган марказлар томонидан амалга оширилади.
Бундан ташқари, 2023 йил 1 апрелдан бошлаб, малака тоифаси олиш бўйича тақдим этиладиган ҳужжатлари Давлат хизматлари марказлари орқали фақат электрон шаклда қабул қилиш тартиби жорий этилади.
Малака тоифа сертификатлари QR-код қўйилган ҳолда электрон шаклда расмийлаштирилади.
Кейинги йилдан бошлаб фармацевтика ва тиббиёт ходимлари фаолиятини босқичма-босқич лицензиялашга ўтамиз», – деган Амрилло Иноятов.
Аввалроқ Амрилло Иноятов соғлиқни сақлаш вазири лавозимига тасдиқлангани хабар қилинганди.
Изоҳ (0)