O‘zbekistonda qat’iy nazorat ostida saqlanayotgan “Dok-1 Maks” dorilari haqida ma’lumot berildi.
Davlat bojxona qo‘mitasining O‘zAga ma’lum qilishicha, dekabr oyida O‘zbekistonga keltirilgan “Dok-1 Maks” dorisining uchta partiyasi, ya’ni salkam 60 ming qutisi qat’iy nazorat ostida saqlanmoqda. Bundan tashqari, ushbu dorining ilgari keltirilgan ikkita partiyasi ham DBQ omborida ushlab turilibdi.
Bojxona organlari tomonidan salbiy holatlar kuzatilgan ilk kunlardanoq dori vositasini erkin muomalaga chiqarmaslik bo‘yicha barcha choralar ko‘rilgan va hozirda qat’iy nazorat ostida.
Qo‘mita axborot xizmati rahbari Husan Tangriyevning ma’lum qilishicha, “Dok-1 Maks” dori vositasi O‘zbekiston bozoriga 2012-yildan kirib kelgan. Mutaxassislarga ko‘ra, mazkur dori vositasining shu davr mobaynida nojo‘ya ta’siri bo‘lmagan. Faqatgina bir partiyasida bunday nojo‘ya ta’sir kuzatilgan.
Amaldagi tartiblarga ko‘ra dori vositasini erkin muomalaga chiqarishda dori vositasining O‘zbekistonda ro‘yxatdan o‘tganligini tasdiqlovchi guvohnoma hamda olib kirilayotgan dorilarning har bir seriyasi uchun muvofiqlik sertifikatlari bojxona organlariga taqdim qilinadi. Shundan so‘nggina dori vositalari bojxona rasmiylashtiruvidan o‘tkaziladi.
Eslatib o‘tamiz, mazkur siropni iste’mol qilish ortidan Samarqandda 18 nafar, Toshkent va Qashqadaryoda bir nafardan, jami 20 nafar bola vafot etgani ma’lum bo‘lgandi.
DXX tomonidan “Dok-1 Maks” preparati bilan bog‘liq holat yuzasidan jinoyat ishi qo‘zg‘atilgan. “Dok-1 Maks”ni ishlab chiqargan kompaniyaga tegishli barcha dorilar savdosi vaqtincha to‘xtatilgan.
Izoh (0)