Shavkat Mirziyoyev 29-dekabr kuni Toshkent shahrida bo‘lib o‘tgan zamonaviy darsliklar ko‘rgazmasida ishtirok etgandi. “O‘zbekiston 24” telekanalida ushbu tashrifga bag‘ishlangan maxsus reportaj efirga berildi.
Ko‘rsatuvda ta’kidlanishicha, prezidentning ko‘rgazmaga kelishi kutilgan tashrif bo‘lgan. Chunki bu ta’lim bilan bog‘liq muhim mavzu. Shu sababli hamma narsani davlat rahbarining shaxsan o‘zi ko‘zdan kechirishi kerak.
“Sifatli ta’lim, endi kechagidek dars berishni zamonning o‘zi qabul qilmaydi, mumkin ham emas. Maktab qurib berishimiz shart. Ichidagi muhit, ta’lim, milliy g‘urur va iftixorimiz nuqtayi nazari sizlarga bog‘liq”, — deya o‘qituvchilarga murojaat qildi prezident.
Shundan so‘ng davlat rahbari ko‘rgazma pavilyoniga tashrif buyurib, yangi avlod darsliklarini ko‘zdan kechirgan. Prezident bunda asosiy e’tiborni o‘qituvchilarning o‘zi zamonaviy ko‘nikmalarni qay darajada qabul qila olishiga qaratgan.
“Bu darslik, kitoblarimiz 10 foiz, mayli 20 foiz bo‘lsin, lekin 75-80 foiz masala o‘qituvchining bilimida qoladi. Mening eng katta tashvishim bu yangiliklarni o‘qituvchilar qanday qabul qilarkan?” — deya ta’kidladi Mirziyoyev.
Reportajda ma’lum qilinishicha, bu masalaning yechimi sifatida respublikaning turli hududlaridan kelgan o‘qituvchilar uchun tajriba va ko‘nikma almashish maydonchasi tashkil etilgan. Unda pedagoglarga yangi darsliklar bo‘yicha tushunchalar berilgan.
“Bu finlyandiyalik mutaxassislar tomonidan berilgan litsenziya. Ular darsliklardagi har bir topshiriqni, o‘quvchilarning kreativligini, mantiqiy fikrlashini, jamoada ishlay olishini va bu topshiriq ko‘nikmalarni qanchalik rivojlantirishini ko‘rib chiqqan va ijobiy baholashgan.
Finlyandiya tajribasini to‘lig‘icha ko‘chirib olmoqchi emasmiz. Ularning ko‘nikmasini o‘rganib, milliy qadriyatlarimiz va o‘z xususiyatlarimizga moslashtirgan holda bu tajribalarni qo‘llamoqchimiz”,— deydi poytaxtdagi 144-maktab o‘qituvchisi Nodira Azizova.
Qayd etilishicha, yangi darsliklar Toshkent shahridagi 134-maktabda hozirgacha sinovdan o‘tkazilgan. Birlamchi natijalarga ko‘ra, o‘quvchilarning o‘zlashtirish natijasi 88 foizni tashkil etgan. Amaldagi dastur bo‘yicha esa bu ko‘rsatkich 67 foiz.
“Sentabr oyidan boshlab, bizning maktabda xalqaro tajriba sinovi o‘tkazilmoqda. To‘g‘risini aytadigan bo‘lsak, darsliklar o‘quvchilar uchun ham, o‘qituvchilar uchun ham juda qulay. O‘qituvchilarning ko‘p gapirishiga ehtiyoj qolmagan. Har bir shartli belgi o‘quvchiga yod bo‘lib ketadi.
Masalan, matematika darsligini oladigan bo‘lsak, to‘rttadan boshlab to‘qqiztagacha topshiriq beriladi. Bilamizki, har bir sinfda sekin va tez o‘zlashtiradigan o‘quvchilar bo‘ladi. Yangi darslikda sekin o‘zlashtiradigan o‘quvchilar topshiriqlarni bajarguncha, super o‘quvchilar keyingi topshiriqlarga mustaqil ravishda o‘tishi uchun imkoniyat yaratilgan”, — deydi 134-maktab o‘qituvchisi Gavhar Rashidova.
Yangi darsliklarning o‘ziga xosligi nimada?
Prezidentga taqdimot qilingan yangi avlod darsliklarining o‘quv-metodik komplekslar (O‘MK) asosini 4K tamoyili tashkil etadi:
- Kritik (tanqidiy) fikrlash;
- Kollaboratsiya (jamoaviy ishlash);
- Kreativlik (ijodkorlik);
- Kommunikatsiya (muloqot ko‘nikmalari).
Izoh (0)