Шавкат Мирзиёев 29 декабрь куни Тошкент шаҳрида бўлиб ўтган замонавий дарсликлар кўргазмасида иштирок этганди. «Ўзбекистон 24» телеканалида ушбу ташрифга бағишланган махсус репортаж эфирга берилди.
Кўрсатувда таъкидланишича, президентнинг кўргазмага келиши кутилган ташриф бўлган. Чунки бу таълим билан боғлиқ муҳим мавзу. Шу сабабли ҳамма нарсани давлат раҳбарининг шахсан ўзи кўздан кечириши керак.
«Сифатли таълим, энди кечагидек дарс беришни замоннинг ўзи қабул қилмайди, мумкин ҳам эмас. Мактаб қуриб беришимиз шарт. Ичидаги муҳит, таълим, миллий ғурур ва ифтихоримиз нуқтаи назари сизларга боғлиқ», — дея ўқитувчиларга мурожаат қилди президент.
Шундан сўнг давлат раҳбари кўргазма павильонига ташриф буюриб, янги авлод дарсликларини кўздан кечирган. Президент бунда асосий эътиборни ўқитувчиларнинг ўзи замонавий кўникмаларни қай даражада қабул қила олишига қаратган.
«Бу дарслик, китобларимиз 10 фоиз, майли 20 фоиз бўлсин, лекин 75-80 фоиз масала ўқитувчининг билимида қолади. Менинг энг катта ташвишим бу янгиликларни ўқитувчилар қандай қабул қиларкан?» — дея таъкидлади Мирзиёев.
Репортажда маълум қилинишича, бу масаланинг ечими сифатида республиканинг турли ҳудудларидан келган ўқитувчилар учун тажриба ва кўникма алмашиш майдончаси ташкил этилган. Унда педагогларга янги дарсликлар бўйича тушунчалар берилган.
«Бу финляндиялик мутахассислар томонидан берилган лицензия. Улар дарсликлардаги ҳар бир топшириқни, ўқувчиларнинг креативлигини, мантиқий фикрлашини, жамоада ишлай олишини ва бу топшириқ кўникмаларни қанчалик ривожлантиришини кўриб чиққан ва ижобий баҳолашган.
Финляндия тажрибасини тўлиғича кўчириб олмоқчи эмасмиз. Уларнинг кўникмасини ўрганиб, миллий қадриятларимиз ва ўз хусусиятларимизга мослаштирган ҳолда бу тажрибаларни қўлламоқчимиз»,— дейди пойтахтдаги 144-мактаб ўқитувчиси Нодира Азизова.
Қайд этилишича, янги дарсликлар Тошкент шаҳридаги 134-мактабда ҳозиргача синовдан ўтказилган. Бирламчи натижаларга кўра, ўқувчиларнинг ўзлаштириш натижаси 88 фоизни ташкил этган. Амалдаги дастур бўйича эса бу кўрсаткич 67 фоиз.
«Сентябрь ойидан бошлаб, бизнинг мактабда халқаро тажриба синови ўтказилмоқда. Тўғрисини айтадиган бўлсак, дарсликлар ўқувчилар учун ҳам, ўқитувчилар учун ҳам жуда қулай. Ўқитувчиларнинг кўп гапиришига эҳтиёж қолмаган. Ҳар бир шартли белги ўқувчига ёд бўлиб кетади.
Масалан, математика дарслигини оладиган бўлсак, тўрттадан бошлаб тўққизтагача топшириқ берилади. Биламизки, ҳар бир синфда секин ва тез ўзлаштирадиган ўқувчилар бўлади. Янги дарсликда секин ўзлаштирадиган ўқувчилар топшириқларни бажаргунча, супер ўқувчилар кейинги топшириқларга мустақил равишда ўтиши учун имконият яратилган», — дейди 134-мактаб ўқитувчиси Гавҳар Рашидова.
Янги дарсликларнинг ўзига хослиги нимада?
Президентга тақдимот қилинган янги авлод дарсликларининг ўқув-методик комплекслар (ЎМК) асосини 4К тамойили ташкил этади:
- Критик (танқидий) фикрлаш;
- Коллаборация (жамоавий ишлаш);
- Креативлик (ижодкорлик);
- Коммуникация (мулоқот кўникмалари).
Изоҳ (0)