Namangan shahrining Davlatobod tumanida “Namangan square” turar joy majmuasining ilk ko‘p qavatli uyi foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.
Mazkur loyiha Birlashgan Arab Amirligining MJ Developers kompaniyasi tomonidan Namangan shahriga kirish qismida, 18 gektar maydonda amalga oshirilmoqda. Majmuaning 49 ta xonadoni tayyor bo‘lib, marosim davomida xonadon egalariga uy kalitlari topshirildi.
“Hozir ushbu loyihaning birinchi bosqichi yakuniga yetdi. Investorlar bilan uning kelajagi borasida doimo muloqotda bo‘lib turibmiz. Belgilangan rejalar o‘z vaqtida amalga oshiriladi degan umiddaman”, — dedi ochilish marosimida ishtirok etgan viloyat hokimi Shavkat Abdurazzaqov.
Majmua 2024-yilda to‘liq qurib bitkazilishi va buning uchun 50 million dollar sarflanishi ko‘zda tutilgan. Bugungi kunga qadar ushbu mablag‘dan 9 million dollari o‘zlashtirilib, qurilish ishlari davom ettirilmoqda. Kelgusida ushbu majmuada ko‘p qavatli uylardan tashqari bolalar bog‘chasi, maktab, biznes-markaz hamda zamonaviy mehmonxona ham qad rostlashi rejalashtirilgan.
Eslatib o‘tamiz, oldinroq investor Murali Lal Jalan MJ Developers kompaniyasining Buxoro va Namangandagi loyihalari muammosiz davom etayotgani, Toshkentdagi ishlar esa to‘xtab qolganini bildirgan va buning sabablarini izohlagandi.
Investorning aytishicha, boshida poytaxtdagi qurilishlar ham bir maromda ketayotgandi. 2020-yilda Toshkentning Yangihayot tumanida 100 gektar hududda shoping va biznes markazlari, mehmonxonalar, turar joylar va yana qator binolardan iborat Minerva City nomli aqlli shaharcha qurilishi start oldi.
Loyihaning bir qismi hisoblangan xalqaro universitet binosining tamal toshini qo‘yish marosimida poytaxt hokimi Jahongir Ortiqxo‘jayev ham qatnashib, loyiha barcha uchun olamshumul bo‘lishi, bu jarayonda sarmoyadorlarga har taraflama yordam berilishi va ularga imkoniyatlar ochib berilishini aytgandi.
Oradan salkam 3 yil vaqt o‘tdi. Hududda turar joy majmualarining bir qismi bunyod etildi. Ammo hozirga kelib ishlar to‘xtab qolgan.
Izoh (0)