Наманган шаҳрининг Давлатобод туманида «Namangan square» турар жой мажмуасининг илк кўп қаватли уйи фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.
Мазкур лойиҳа Бирлашган Араб Амирлигининг MJ Developers компанияси томонидан Наманган шаҳрига кириш қисмида, 18 гектар майдонда амалга оширилмоқда. Мажмуанинг 49 та хонадони тайёр бўлиб, маросим давомида хонадон эгаларига уй калитлари топширилди.
«Ҳозир ушбу лойиҳанинг биринчи босқичи якунига етди. Инвесторлар билан унинг келажаги борасида доимо мулоқотда бўлиб турибмиз. Белгиланган режалар ўз вақтида амалга оширилади деган умиддаман», — деди очилиш маросимида иштирок этган вилоят ҳокими Шавкат Абдураззақов.
Мажмуа 2024 йилда тўлиқ қуриб битказилиши ва бунинг учун 50 миллион доллар сарфланиши кўзда тутилган. Бугунги кунга қадар ушбу маблағдан 9 миллион доллари ўзлаштирилиб, қурилиш ишлари давом эттирилмоқда. Келгусида ушбу мажмуада кўп қаватли уйлардан ташқари болалар боғчаси, мактаб, бизнес-марказ ҳамда замонавий меҳмонхона ҳам қад ростлаши режалаштирилган.
Эслатиб ўтамиз, олдинроқ инвестор Мурали Лал Жалан MJ Developers компаниясининг Бухоро ва Намангандаги лойиҳалари муаммосиз давом этаётгани, Тошкентдаги ишлар эса тўхтаб қолганини билдирган ва бунинг сабабларини изоҳлаганди.
Инвесторнинг айтишича, бошида пойтахтдаги қурилишлар ҳам бир маромда кетаётганди. 2020 йилда Тошкентнинг Янгиҳаёт туманида 100 гектар ҳудудда шопинг ва бизнес марказлари, меҳмонхоналар, турар жойлар ва яна қатор бинолардан иборат Minerva City номли ақлли шаҳарча қурилиши старт олди.
Лойиҳанинг бир қисми ҳисобланган халқаро университет биносининг тамал тошини қўйиш маросимида пойтахт ҳокими Жаҳонгир Ортиқхўжаев ҳам қатнашиб, лойиҳа барча учун оламшумул бўлиши, бу жараёнда сармоядорларга ҳар тарафлама ёрдам берилиши ва уларга имкониятлар очиб берилишини айтганди.
Орадан салкам 3 йил вақт ўтди. Ҳудудда турар жой мажмуаларининг бир қисми бунёд этилди. Аммо ҳозирга келиб ишлар тўхтаб қолган.
Изоҳ (0)