Filippinda kuchli yomg‘ir sabab yuzaga kelgan suv toshqinlari oqibatida kamida 25 kishi halok bo‘ldi, 26 kishi bedarak yo‘qoldi. Xavflarning oldini olish va tabiiy ofatlarni bartaraf etish bo‘yicha milliy kengashning 28-dekabr kuni e’lon qilgan hisobotida ta’kidlanishicha, suv toshqini respublikaning 10 ta viloyatida 393 mingdan ortiq kishiga zarar yetkazgan.
Kengash ma’lumotlariga ko‘ra, 292 ta evakuatsiya markazida 81,4 ming kishi ko‘chirilgan. Kamida 1,42 ming kishi oldindan ogohlantirish bilan uyini tark etgan. Ayni paytda to‘qqiz kishi turli tan jarohatlari olgan. Respublikaning to‘qqizta viloyatida tabiiy ofat bilan bog‘liq 366 ta hodisa, jumladan, suv toshqinlari va ko‘chkilar qayd etilgan.
Tabiiy ofat 909 ta uyga zarar yetkazdi va qiymati 11,7 million peso (210 ming dollar) bo‘lgan 287 ta binoni vayron qildi. 32 ta infratuzilma obyektiga yetkazilgan zarar 20,8 million peso (373,3 ming dollar), qishloq xo‘jaligiga yetkazilgan zarar 65,9 million peso (1,17 million dollar)ga baholanmoqda. Suv toshqinlari 123 ta yo‘l va 12 ta ko‘prikni vayron qilgan, 15 ta dengiz portiga zarar yetkazgan. 63 ta shaharda elektr ta’minotida uzilishlar qayd etilgan, shundan 43 tasida ta’minot tiklangan, uchta munitsipalitetda esa suv ta’minoti bilan bog‘liq muammolar saqlanib qolmoqda.
67 ta shahar va 70 ta munitsipalitetda tegishli ravishda ta’lim muassasalarida darslar va korxonalarda ishlash to‘xtatildi. Ikki shaharda favqulodda holat joriy etildi. Hukumat yordam uchun 6,66 million peso (119,2 ming dollar) ajratdi.
Izoh (0)