Сенатнинг бугун (27 декабрь) бўлиб ўтаётган 36-ялпи мажлисида 2023 йил учун давлат бюджетига оид қонун кўриб чиқилди. Бу ҳақда «Дарё» мухбири хабар бермоқда.
Қонунга кўра, 2023 йилда Ўзбекистон иқтисодиётида ялпи ички маҳсулотнинг ўсиш суръатлари 5,3 фоизни ва истеъмол нархлари индекси 2022 йилнинг декабрь ойига нисбатан 9,5 фоиз миқдорида бўлишидан келиб чиқиб, давлат бюджети параметрлари ҳисоб-китоб қилинган.
Молия вазири Тимур Ишметовнинг маълум қилишича, консолидациялашган бюджет даромадлари 2023 йилда 310,7 триллион сўмни ҳамда харажатлар 343,2 триллион сўмни ташкил этиши кутилмоқда.
«2023 йилги давлат бюджети харажатлари (давлат мақсадли жамғармаларига ажратиладиган трансфертлар билан бирга) 257,7 триллион сўмни, ялпи ички маҳсулотга нисбатан 24,1 фоизни ташкил этиши кутилмоқда», — деди вазир.
Мажлисда келаси йили таълим соҳаси харажатларига 58,4 триллион сўм, соғлиқни сақлаш соҳаси чиқимларига 28,4 триллион сўм ажратилаётгани айтилди. Шу билан бирга, маданият соҳасига 2,5 триллион сўм, спортга 2,3 триллион сўм, фанни ривожлантириш тадбирларига 1,8 триллион сўм йўналтириш белгиланган.
2023 йил учун давлат бюджетида аҳолини ижтимоий ҳимоя қилишнинг устувор йўналишларини молиялаштириш учун 18,1 триллион сўм ажратилади.
Келгуси йилда жами 52 мингдан ортиқ даромади юқори бўлмаган ва уй-жой шароитларини яхшилашга муҳтож фуқароларга ипотека кредити бўйича дастлабки бадал ва фоизларнинг бир қисмини қоплаш учун давлат бюджети маблағлари ҳисобидан 1,1 триллион сўм субсидиялар тўлаб берилиши кўзда тутилган.
Қонун билан 2023 йил учун Ўзбекистон номидан ва республика кафолати остида ташқи қарзларни жалб қилиш бўйича йиллик имзоланадиган янги битимларнинг чекланган ҳажми 4,5 миллиард АҚШ доллари миқдорида этиб белгиланмоқда.
Муҳокамалар якунида қонун Сенат аъзолари томонидан маъқулланди.
Изоҳ (0)