Toshkent viloyatining Bo‘ka tumanidagi “Toshloq” mahallasiga 2022-yilning 20-iyun kunidan 21-iyun kuniga o‘tar kechasi kuchli sel keldi va 50 dan ortiq xonadonlarni suv bosdi. Zarar yetgan uylarning 23 tasi yashab bo‘lmaydigan darajaga yetdi. Qayta ta’mirlanib, zamonaviy ko‘rinishga kelgan uylar 25-dekabr kuni egalariga topshirildi.
O‘sha paytdagi holatni yana tasavvur qilish qiyin. Biz o‘sha kuni erta tongda voqea joyiga kelgan bo‘lsak, kechgacha suv qaytmadi. Shu mahalladagi ikkinchi xonadonning tom qismidagi shiferining tagigacha suv bor edi. Xonadon egasi chiqib, “o‘qituvchiman, uyimdan hech narsa ololmadim”, dedi. O‘sha uydan nariga tomonga o‘tolmadik. Keyin kechki payt etiklarda o‘tib, ahvolni ko‘rganimizda dastlab 17 ta uyga kuchli zarar yetgan deyishdi. Keyin 20 ta, so‘ngra 27 ta uyga zarar yetgan ekan deyishdi. Keyinchalik ushbu mahallada 50 dan ortiq xonadonlarga zarar yetkazilgani, 23 ta xonadon esa umuman yashab bo‘lmaydigan darajaga kelgani aniqlandi, — deydi voqeani eslagan Toshkent viloyati hokimi Zoir Mirzayev.
Hokimning aytishicha, mazkur holat haqida o‘sha kunning o‘zida prezident Shavkat Mirziyoyevga xabar berilgan.
Biz o‘sha kuni bu haqda hurmatli prezidentimizga axborot berganimizda u kishi bu yerda zamonaviy ko‘cha bo‘lsin, obod mahalla bo‘lsin dedilar. Shuningdek, yangi quriladigan uylar loyihasi xonadon egalarining xohish-istagidan kelib chiqqan holda bo‘lishi kerak dedilar. Shundan so‘ng har bir xonadon vakillari bilan gaplashib, ular xohlagan loyiha bo‘yicha xonadonlar qurdik va aholiga bo‘lib berdik, — deydi viloyat rahbari.
Zoir Mirzayevning ma’lumot berishicha, mazkur hududdagi xonadonlar barcha tashkilotlar homiyligida qayta qurilgan va ta’mirlangan.
Bir kunda homiylik yordami asosida 400 tonnadan ortiq sement yig‘ildi, 7000 tacha shifer yig‘ildi. Banklar tashabbus qilib, adashmasam 400 ming dona g‘isht olib keldi. Sababi prezidentimiz uylar pishiq g‘ishtdan bo‘lishi kerak degan topshiriqni bergandilar. Barcha tashkilotlar homiylik qildi. Davlat borligini, davlatning kuch qudratli ekanini xalqimiz sezdi, — deydi viloyat hokimi.
O‘sha kungi voqeani eslashning o‘zi dahshat. Holat nihoyatda yomon edi. Uyimizni suv bosgani sabab, qulab tushgan edi. Bolalarim va nabiralarim bilan o‘zimiz omon chiqdik. Hasan-Husan ismli o‘g‘illarim meni ko‘tarib chiqishdi. Suvda yurish imkonsiz edi. Prezidentimizga, viloyat hokimiga katta rahmat, shunday zamonaviy uylar qurib, bizni xursand qilishdi, — deydi Barno opa Nurboboyeva.
Bo‘ka tuman Favqulodda vaziyatlar bo‘limi boshlig‘i Shuhrat Pardabekovning aytishicha, o‘sha kungi sel tinimsiz yomg‘irlar sabab yuzaga kelgan bo‘lib, tumanning ikkita mahallasidagi xonadonlarga zarar yetkazgan.
Ushbu sodir bo‘lgan tabiiy ofat tezlikda bartaraf etilib, aholi evakuatsiya qilindi, — deydi Shuhrat Pardabekov.
Bo‘ka tumani hokimi Nizomiddin Abbosovning aytishicha, u dastlab talafot yetgan xonadon vakillari bilan suhbatlashganda uylar ta’mirlab berilishini, hech kim muammosi bilan yolg‘iz qolmasligini aytgan, ammo mablag‘ masalasida o‘ylovga tushgan.
To‘g‘risi, o‘zim ham bunga ishonmagandim. Hokim bo‘lsam-da bunaqa holatga birinchi marotaba tushgandim. Muammolarni ko‘rib, aholini ovutishga, ularning uylari ta’mirlab berilishini aytsam-da, mablag‘ni qayerdan olamiz degan o‘ylov bor edi. Mingdan ming rahmat prezidentimiz topshirig‘i hamda viloyat hokimimizning tashabbuslari bilan viloyat mahalliy budjetidan mablag‘ ajratib berildi. Qolaversa, viloyatimizdagi tashkilotlar homiylik qildi. Bugun aholi xursand, ularning muammosi hal bo‘ldi. Bundan biz rahbarlarning ham ko‘nglimiz chog‘, — deydi tuman hokimi Nizomiddin Abbosov.
Izoh (0)