Тошкент вилоятининг Бўка туманидаги «Тошлоқ» маҳалласига 2022 йилнинг 20 июнь кунидан 21 июнь кунига ўтар кечаси кучли сел келди ва 50 дан ортиқ хонадонларни сув босди. Зарар етган уйларнинг 23 таси яшаб бўлмайдиган даражага етди. Қайта таъмирланиб, замонавий кўринишга келган уйлар 25 декабрь куни эгаларига топширилди.
Ўша пайтдаги ҳолатни яна тасаввур қилиш қийин. Биз ўша куни эрта тонгда воқеа жойига келган бўлсак, кечгача сув қайтмади. Шу маҳалладаги иккинчи хонадоннинг том қисмидаги шиферининг тагигача сув бор эди. Хонадон эгаси чиқиб, «ўқитувчиман, уйимдан ҳеч нарса ололмадим», деди. Ўша уйдан нарига томонга ўтолмадик. Кейин кечки пайт этикларда ўтиб, аҳволни кўрганимизда дастлаб 17 та уйга кучли зарар етган дейишди. Кейин 20 та, сўнгра 27 та уйга зарар етган экан дейишди. Кейинчалик ушбу маҳаллада 50 дан ортиқ хонадонларга зарар етказилгани, 23 та хонадон эса умуман яшаб бўлмайдиган даражага келгани аниқланди, — дейди воқеани эслаган Тошкент вилояти ҳокими Зоир Мирзаев.
Ҳокимнинг айтишича, мазкур ҳолат ҳақида ўша куннинг ўзида президент Шавкат Мирзиёевга хабар берилган.
Биз ўша куни бу ҳақда ҳурматли президентимизга ахборот берганимизда у киши бу ерда замонавий кўча бўлсин, обод маҳалла бўлсин дедилар. Шунингдек, янги қуриладиган уйлар лойиҳаси хонадон эгаларининг хоҳиш-истагидан келиб чиққан ҳолда бўлиши керак дедилар. Шундан сўнг ҳар бир хонадон вакиллари билан гаплашиб, улар хоҳлаган лойиҳа бўйича хонадонлар қурдик ва аҳолига бўлиб бердик, — дейди вилоят раҳбари.
Зоир Мирзаевнинг маълумот беришича, мазкур ҳудуддаги хонадонлар барча ташкилотлар ҳомийлигида қайта қурилган ва таъмирланган.
Бир кунда ҳомийлик ёрдами асосида 400 тоннадан ортиқ цемент йиғилди, 7000 тача шифер йиғилди. Банклар ташаббус қилиб, адашмасам 400 минг дона ғишт олиб келди. Сабаби президентимиз уйлар пишиқ ғиштдан бўлиши керак деган топшириқни бергандилар. Барча ташкилотлар ҳомийлик қилди. Давлат борлигини, давлатнинг куч қудратли эканини халқимиз сезди, — дейди вилоят ҳокими.
Ўша кунги воқеани эслашнинг ўзи даҳшат. Ҳолат ниҳоятда ёмон эди. Уйимизни сув босгани сабаб, қулаб тушган эди. Болаларим ва набираларим билан ўзимиз омон чиқдик. Ҳасан-Ҳусан исмли ўғилларим мени кўтариб чиқишди. Сувда юриш имконсиз эди. Президентимизга, вилоят ҳокимига катта раҳмат, шундай замонавий уйлар қуриб, бизни хурсанд қилишди, — дейди Барно опа Нурбобоева.
Бўка туман Фавқулодда вазиятлар бўлими бошлиғи Шуҳрат Пардабековнинг айтишича, ўша кунги сел тинимсиз ёмғирлар сабаб юзага келган бўлиб, туманнинг иккита маҳалласидаги хонадонларга зарар етказган.
Ушбу содир бўлган табиий офат тезликда бартараф этилиб, аҳоли эвакуация қилинди, — дейди Шуҳрат Пардабеков.
Бўка тумани ҳокими Низомиддин Аббосовнинг айтишича, у дастлаб талафот етган хонадон вакиллари билан суҳбатлашганда уйлар таъмирлаб берилишини, ҳеч ким муаммоси билан ёлғиз қолмаслигини айтган, аммо маблағ масаласида ўйловга тушган.
Тўғриси, ўзим ҳам бунга ишонмагандим. Ҳоким бўлсам-да бунақа ҳолатга биринчи маротаба тушгандим. Муаммоларни кўриб, аҳолини овутишга, уларнинг уйлари таъмирлаб берилишини айтсам-да, маблағни қаердан оламиз деган ўйлов бор эди. Мингдан минг раҳмат президентимиз топшириғи ҳамда вилоят ҳокимимизнинг ташаббуслари билан вилоят маҳаллий бюджетидан маблағ ажратиб берилди. Қолаверса, вилоятимиздаги ташкилотлар ҳомийлик қилди. Бугун аҳоли хурсанд, уларнинг муаммоси ҳал бўлди. Бундан биз раҳбарларнинг ҳам кўнглимиз чоғ, — дейди туман ҳокими Низомиддин Аббосов.
Изоҳ (0)