Yevropa Ukraina uchun ham, o‘zi uchun ham yetarlicha o‘q-dorilar ishlab chiqarishga bor kuchi bilan urinmoqda, biroq ishlab chiqarish quvvatlarining yetishmasligi bu jarayonni to‘xtatib qo‘ymoqda, bu esa NATO davlatlarining o‘z mudofaa qobiliyatini va Kiyevni qo‘llab-quvvatlashini xavf ostiga qo‘yadi, deb yozmoqda The Wall Street Journal.
Gazeta ta’kidlashicha, Rossiya va Yevropadagi NATO davlatlari o‘rtasida “qayta qurollanish uchun poyga” boshlangan. Ukraina o‘q-dorilarni “Ikkinchi jahon urushidan beri kuzatilmagan darajada” ko‘p ishlatmoqda: harbiylar kuniga 6 000 ga yaqin artilleriya snaryadlarini otmoqda, ulardagi zenit raketalari esa tugab bormoqda.
AQSHdan tashqari NATOning hech bir davlatida keng ko‘lamli artilleriya janglarini o‘tkazish uchun yetarlicha qurol-yarog‘ yoki zaxira yaratish salohiyati yo‘q, deydi xalqaro xavfsizlik bo‘yicha ekspert, Germaniya Mudofaa vazirligi qo‘mondonlik shtabining sobiq rahbari Niko Lange. Bu esa alyans hujum sodir bo‘lgan taqdirda o‘zini himoya qila olmasligini anglatadi, dedi u. “Hukumatlar o‘nlab yillar davomida shartnomalarni qisqartirib keldi, shuning uchun kompaniyalar ishlab chiqarish liniyalari va xodimlarni kamaytirmoqda”, — deydi Lange.
“Ukraina oyiga 40 000 tagacha 155 millimetrli artilleriya snaryadlarini ishlatmoqda, Yevropada bunday snaryadlarning umumiy ishlab chiqarilishi yiliga 300 000 tani tashkil etadi”, — deydi Czechoslovak Group AS (Yevropa artilleriya snaryadlarining 30 foizini ishlab chiqaradigan chex kompaniyasi) egasi Mixal Strnad. Ukrainadagi jangovar harakatlar “bir kechada” to‘xtagan taqdirda ham, uning so‘zlariga ko‘ra, Yevropaga o‘z zaxiralarini hozirgi ishlab chiqarish sur’atlarida to‘ldirish uchun 15 yil kerak bo‘ladi.
Izoh (0)