NATO Ukraina armiyasi tomonidan foydalanilayotgan sovet davriga oid qurol-yarog‘lar tizimiga mablag‘ kiritish variantlarini ko‘rib chiqmoqda. Bu haqda AQSH Davlat departamenti rahbari Entoni Blinken CNN’ga ma’lum qildi.
“Biz ukrainaliklarni ularga kerak bo‘lgan va ular uchun samarali bo‘lgan narsalar bilan ta’minlash uchun barcha variantlarni ko‘rib chiqyapmiz. Bu Ukraina qurolli kuchlarida bir necha o‘n yillardan beri mavjud bo‘lib kelayotgan sovet davriga oid qurol-yarog‘ tizimlariga ham tegishlidir: masalan, ushbu tizimalr uchun o‘q-dorilar yetkazib berishni ko‘rib chiqyapmiz. Ba’zi hollarda bu ancha vaqtlardan buyon ishlab chiqarilmayotgan narsalarni qaytadan chiqarishni boshlashni talab qilishi mumkin”, — dedi Blinken.
26-noyabr kuni The New York Times NATOga a’zo mamlakatlar Chexiya, Slovakiya va Bolgariyadagi eski zavodlarga investitsiyalar kiritib, u yerlarda Ukrainaning sovet namunasidagi artilleriya tizimlari uchun snaryadlar ishlab chiqarish imkoniyatini muhokama qilayotgani haqida xabar bergandi.
Rossiya va Ukraina urushida ko‘p miqdorda artilleriya snaryadlari qo‘llanilmoqda. The New York Times NATOdagi manbasiga tayanib ma’lum qilishicha, yozda Ukraina qurolli kuchlari Donbassda kuniga 6-7 mingta, Rossiya armiyasi esa 40-50 mingta snaryadlar qo‘llagan. Taqqoslash uchun, Afg‘onistondagi urush chog‘ida AQSH va uning NATO bo‘yicha ittifoqdoshlari kuniga qariyb 300 ta snaryad chiqargan, hozir esa AQSHda oyiga 15 mingta snaryad chiqariladi.
Avvalroq Ukraina tashqi ishlar vaziri Dmitriy Kuleba NATO mamlakatlarini Ukrainaga iloji boricha tezroq qurol-yarog‘ yuborishga va G‘arbda yangi qurol ishlab chiqarish korxonalarini ochishga chaqirgan edi.
Izoh (0)