Rossiya Tashqi ishlar vazirligining uchinchi departamenti rahbari Aleksandr Sternik Moskvaning Markaziy Osiyodagi sheriklariga nisbatan siyosatining asosi “strategik sabr-toqat”dan iborat ekanini va “amaliy harakatlar” shunga asoslanishini ma’lum qildi. Bu haqda u ushbu mintaqa mamlakatlarining “muhmal” harakatlariga, masalan, Rossiyaga qarshi sanksiyalarga amal qilishiga qanday munosabat ko‘rsatishi haqidagi savolga javob berayotib aytib o‘tdi.
“Biz barcha o‘yinchilarning xatti-harakatlarini avvalo Rossiya manfaatlariga zarar berish yoki bermasligi nuqtai nazaridan baholaymiz, — dedi Sternik. — Va bundan tegishli xulosalar chiqaramiz, shu jumladan, Rossiya Federatsiyasi bilan bu ko‘p tarmoqli aloqalarni yo‘qotmaslikdan juda manfaatdor bo‘lgan sheriklar bilan birgalikda. Aloqalarni to‘xtatishga qilingan kichik ishora ham shunchalik katta iqtisodiy xarajatlarga olib kelishi mumkinki, ularni xo‘jayinlar (g‘arblik o‘yinchilar nazarda tutilmoqda) tomonidan kompensatsiya haqidagi hech qanday va’dalar qoplay olmaydi”.
O‘z nutqi chog‘ida Aleksandr Sternik Rossiya ishtirokidagi xalqaro tashkilotlarda, xususan, Yevrosiyo iqtisodiy ittifoqi va Kollektiv xavfsizlik shartnomasi tashkilotida, diplomatning fikricha, “dunyoning boshqa mintaqalaridagi birlashmalarga xos bo‘lgan” “kaltaklash yo‘li bilan intizom o‘rnatish” yo‘qligini aytdi.
“Agar A mamlakatining pozitsiyasi B mamlakatining pozitsiyasi bilan mos kelmayotganini ko‘rsak, biz A yoki Bning tarafini olmasdan, yaxshisi, moderator pozitsiyasini egallaymiz”, — dedi diplomat va bunday tamoyil Kavkazortida ham, Markaziy Osiyoda ham qo‘llanilganini eslatib.
Diplomat, shuningdek, mintaqa mamlakatlarining yangi transport yo‘laklarini, masalan, Kaspiy dengizi orqali bunday yo‘laklarni ishga tushirish tashabbuslariga xotirjam qarashini ta’kidladi. “Jahon bozorlariga chiqishning yangi yo‘llarini qidirish — har qanday mamlakatning suveren huquqi”, — dedi u.
Sternik “Valday” xalqaro munozara klubi doirasida “Markaziy Osiyo va Ukraina inqirozi” konferensiyasida qatnashdi.
Markaziy Osiyo mamlakatlari uchun 2022-yilgi voqealar oqibatlari haqidagi ma’ruzaning bosh muallifi, postsovet makonida jamoatchilik-siyosiy jarayonlarni o‘rganish bo‘yicha axborot-tahliliy markaz direktori Darya Chijova ham Rossiyaning o‘z sheriklari xatti-harakatlariga nisbatan reaksiyasi masalasida “qat’iy tuzatish kiritishga o‘rin yo‘qligi”ni aytdi.
“Markaziy Osiyo mamlakatlari uchun Rossiyaga qarshi sanksiyalar oqibatlarini minimallashtirish imkoniyati yuzaga kelishiga sabab shundan iboratki, bizning barcha darajalardagi ishimiz moslashuvchan edi. Bu bizning munosabatlarimizga zamon ruhiga moslashish imkonini bermoqda”, — dedi Chijova.
Izoh (0)