Европа Украина учун ҳам, ўзи учун ҳам етарлича ўқ-дорилар ишлаб чиқаришга бор кучи билан уринмоқда, бироқ ишлаб чиқариш қувватларининг етишмаслиги бу жараённи тўхтатиб қўймоқда, бу эса НАТО давлатларининг ўз мудофаа қобилиятини ва Киевни қўллаб-қувватлашини хавф остига қўяди, деб ёзмоқда The Wall Street Journal.
Газета таъкидлашича, Россия ва Европадаги НАТО давлатлари ўртасида «қайта қуролланиш учун пойга» бошланган. Украина ўқ-дориларни «Иккинчи жаҳон урушидан бери кузатилмаган даражада» кўп ишлатмоқда: ҳарбийлар кунига 6 000 га яқин артиллерия снарядларини отмоқда, улардаги зенит ракеталари эса тугаб бормоқда.
АҚШдан ташқари НАТОнинг ҳеч бир давлатида кенг кўламли артиллерия жангларини ўтказиш учун етарлича қурол-яроғ ёки захира яратиш салоҳияти йўқ, дейди халқаро хавфсизлик бўйича эксперт, Германия Мудофаа вазирлиги қўмондонлик штабининг собиқ раҳбари Нико Ланге. Бу эса альянс ҳужум содир бўлган тақдирда ўзини ҳимоя қила олмаслигини англатади, деди у. «Ҳукуматлар ўнлаб йиллар давомида шартномаларни қисқартириб келди, шунинг учун компаниялар ишлаб чиқариш линиялари ва ходимларни камайтирмоқда», — дейди Ланге.
«Украина ойига 40 000 тагача 155 миллиметрли артиллерия снарядларини ишлатмоқда, Европада бундай снарядларнинг умумий ишлаб чиқарилиши йилига 300 000 тани ташкил этади», — дейди Czechoslovak Group АС (Европа артиллерия снарядларининг 30 фоизини ишлаб чиқарадиган чех компанияси) эгаси Михал Стрнад. Украинадаги жанговар ҳаракатлар «бир кечада» тўхтаган тақдирда ҳам, унинг сўзларига кўра, Европага ўз захираларини ҳозирги ишлаб чиқариш суръатларида тўлдириш учун 15 йил керак бўлади.
Изоҳ (0)