O‘zbekiston tashqi ishlar vaziri Vladimir Norov 22-dekabr kuni Yaponiya poytaxti Tokio shahrida All Nippon Airlines kompaniyasi prezidenti Shin’ichi Inoue bilan uchrashdi. Bu haqda vazirlik axborot xizmati xabar berdi.
Muloqotda turizm va aviatsiya sohalarida ikki tomonlama munosabatlarni yanada mustahkamlash istiqbollari yuzasidan fikr almashildi. Yaponiya tomoni O‘zbekistonda turizmni faol rivojlantirish, xorijlik sayyohlar uchun shart-sharoit yaratish, turizm infratuzilmasini ko‘paytirish borasida amalga oshirilayotgan ishlar natijalarini ijobiy baholadi.
Yaponiyadan O‘zbekistonga sayyohlar oqimini ko‘paytirish, jumladan, fuqaro aviatsiyasini barcha yo‘nalishlarda rivojlantirish imkoniyatlari mavjudligi ta’kidlandi. Shu nuqtayi nazardan Samarqand, Buxoro, Urganch va O‘zbekistonning boshqa tarixiy shaharlariga All Nippon Airlines aviaqatnovlarini yo‘lga qo‘yish masalalari muhokama qilindi.
Avvalroq ham O‘zbekiston delegatsiyasining Yaponiyaga tashrifi doirasida bosh vazir o‘rinbosari — turizm va madaniy meros vaziri Aziz Abduhakimov All Nippon Airlines aviakompaniyasi vitse-prezidenti Junichiro Miyagava bilan muzokara o‘tkazgandi.
Uchrashuvda Yaponiyadan O‘zbekistonning tarixiy shaharlariga to‘g‘ridan to‘g‘ri aviareyslarni yo‘lga qo‘yish, respublikaga keluvchi yaponiyalik sayyohlar oqimini oshirish va turizm sohasidagi loyihalarni amalga oshirish masalalari muhokama etilgan.
Mavzuga doir: Yaponiyaning yirik shaharlaridan O‘zbekistonga charter havo qatnovlari tashkil etiladi
Izoh (0)