Ўзбекистон ташқи ишлар вазири Владимир Норов 22 декабрь куни Япония пойтахти Токио шаҳрида All Nippon Airlines компанияси президенти Шинъичи Иноуэ билан учрашди. Бу ҳақда вазирлик ахборот хизмати хабар берди.
Мулоқотда туризм ва авиация соҳаларида икки томонлама муносабатларни янада мустаҳкамлаш истиқболлари юзасидан фикр алмашилди. Япония томони Ўзбекистонда туризмни фаол ривожлантириш, хорижлик сайёҳлар учун шарт-шароит яратиш, туризм инфратузилмасини кўпайтириш борасида амалга оширилаётган ишлар натижаларини ижобий баҳолади.
Япониядан Ўзбекистонга сайёҳлар оқимини кўпайтириш, жумладан, фуқаро авиациясини барча йўналишларда ривожлантириш имкониятлари мавжудлиги таъкидланди. Шу нуқтаи назардан Самарқанд, Бухоро, Урганч ва Ўзбекистоннинг бошқа тарихий шаҳарларига All Nippon Airlines авиақатновларини йўлга қўйиш масалалари муҳокама қилинди.
Аввалроқ ҳам Ўзбекистон делегациясининг Японияга ташрифи доирасида бош вазир ўринбосари — туризм ва маданий мерос вазири Азиз Абдуҳакимов All Nippon Airlines авиакомпанияси вице-президенти Жуничиро Миягава билан музокара ўтказганди.
Учрашувда Япониядан Ўзбекистоннинг тарихий шаҳарларига тўғридан-тўғри авиарейсларни йўлга қўйиш, республикага келувчи япониялик сайёҳлар оқимини ошириш ва туризм соҳасидаги лойиҳаларни амалга ошириш масалалари муҳокама этилган.
Мавзуга доир: Япониянинг йирик шаҳарларидан Ўзбекистонга чартер ҳаво қатновлари ташкил этилади
Изоҳ (0)