Xorazm viloyatining Urganch shahrida IIB xodimlari muz yorilib, kanalga tushib ketgan fuqaro hayotini saqlab qoldi. Bu haqda viloyat IIB matbuot xizmati xabar berdi.
Ma’lum qilinishicha, 17-dekabr kuni tungi soat 02:30 larda “Xavfsiz hayot” mobil ilovasi orqali chaqiruv e’lon qilingan. Shu yaqin atrofda xizmat vazifasini o‘tayotgan Xorazm viloyati IIB JXX JTSB PPX batalyoni 1-otryad haydovchi xodimi, kichik serjant Razzoq Abdullayev hamda 2-otryad safdor xodimi, safdor Tohir Shamakov darhol mobil ilova orqali chaqiruv yuborgan fuqaro bilan bog‘langan.
U “Mash’al” mahallasi hududidan o‘tuvchi Shovot kanalida noma’lum shaxs muz yorilib ketishi oqibatida suvga tushib ketgani, zudlik bilan unga yordam berilmasa, hayoti xavf ostida ekanligini aytgan. Tezkor ma’lumotga ega bo‘lgan PPX batalyoni xodimlari zudlik bilan hodisa joyiga yetib borib, kanaldagi fuqaroni suvdan olib chiqib, unga tez tibbiy yordam ko‘rsatgan.
Surishtiruvlar davomida aniqlanishicha, Urganch tumanida yashovchi ushbu fuqaro to‘ydan mast holda qaytayotgan bo‘lgan. Yarim tunda taksi uchramagach, piyoda ketishga qaror qilgan. Shahardagi Shovot kanali ko‘prigidan o‘tayotib, muz ustida yurib ko‘rishga qaror qilgan va kanalga tushib, to‘rt-besh qadam yurgach, muz yorilib suvga tushib ketgan.
“Baxtimga kanalning sayozroq joyi ekan. Shunday bo‘lsa-da, bir zumda oyoqlarim loyga botib, harakatlanolmay qoldim. Bir necha bor qirg‘oqqa chiqishga urindim. Ammo tun sovug‘i tufayli tan-badanim bir zumda muzlab qoldi. Vaqt o‘tgan sayin oyoqlarim loyga botib, cho‘ka boshladim”, — deya voqeani so‘zlab bergan jabrlangan fuqaro.
Shundan so‘ng yordam so‘rab baqirgan va buni eshitgan o‘tkinchi fuqarolardan biri PPX batalyoni xodimlarini chaqirgan.
Izoh (0)