Yaponiyadan O‘zbekistonning tarixiy shaharlariga aviareyslar yo‘lga qo‘yilishi rejalashtirilmoqda, deb xabar beradi Turizm va madaniy meros vazirligi matbuot xizmati.
Qayd etilishicha, O‘zbekiston delegatsiyasining Yaponiyaga tashrifi doirasida bosh vazir o‘rinbosari — turizm va madaniy meros vaziri Aziz Abduhakimov All Nippon Airlines aviakompaniyasi vitse-prezidenti Junichiro Miyagava bilan muzokara o‘tkazdi.
Uchrashuvda Yaponiyadan O‘zbekistonning tarixiy shaharlariga to‘g‘ridan-to‘g‘ri aviareyslarni yo‘lga qo‘yish, respublikaga keluvchi yaponiyalik sayyohlar oqimini oshirish va turizm sohasidagi loyihalarni amalga oshirish masalalari muhokama etildi.
Junichiro Miyagava O‘zbekiston yaponiyalik sayyohlar uchun jozibador mamlakat ekanini qayd etib, Shavkat Mirziyoyev boshchiligida olib borilayotgan islohotlar sabab yaponiyalik turistlarning O‘zbekiston tarixi va madaniy merosiga bo‘lgan qiziqishi tobora ortib borayotganini ta’kidladi.
2022-yilning avgustidan Uzbekistan Airways tomonidan Toshkent—Tokio—Toshkent xalqaro yo‘nalishidagi muntazam reyslar tiklangani hamda fuqarolik aviatashuvlarni rivojlantirishda yaqindan hamkorlik yo‘lga qo‘yilganini inobatga olib, ANA aviakompaniyasining Yaponiyadan O‘zbekistonning turistik shaharlari (Samarqand, Buxoro, Urganch)ga aviareyslarni yo‘lga qo‘yish taklif etildi.
Shuningdek, All Nippon Airlines kompaniyasining Tokio va Osaka shaharlaridan Samarqand shahriga charter dasturlarini amalga oshirish masalasini ishlab chiqishga kelishildi.
Izoh (0)