Toshkent viloyatida 57 tup ko‘p yillik sog‘lom daraxtlar noqonuniy kesib tashlandi

Toshkent viloyatining Parkent tumanida 57 tup ko‘p yillik sog‘lom daraxtlar tag qismidan noqonuniy kesilganligi aniqlandi. Bu haqda Toshkent viloyati Ekologiya va atrof-muhitni muhofaza qilish boshqarmasi xabar qildi.

Ijtimoiy tarmoqlarda Toshkent viloyatining Parkent tumanida bir necha yillik daraxtlar kesib tashlanayotgani haqida xabar tarqalgach, holat Ekologiya va atrof-muhitni muhofaza qilish sohasidagi nazorat bo‘yicha inspeksiya hamda Toshkent viloyati Ekologiya va atrof-muhitni muhofaza qilish boshqarmasi mas’ullari bilan hamkorlikda joyiga chiqib o‘rganilgan.

O‘rganish davomida aniqlanishicha, Parkent tumani Obodonlashtirish boshqarmasi tomonidan Davlat xizmatlari agentligiga 25-oktabr kuni yo‘llangan arizada quriyotgan yoki qurib qolgan 6 tup yovvoyi olma, 16 tup terak, 12 tup Zarafshon archasi, 25 tup past bo‘yli qayrag‘och, 8 tup shumtol, 6 tup zarang bargli chinor daraxtlarini kesishga ruxsat so‘ralgan.

Biroq Krasnogorsk qo‘rg‘oni hududidagi “Oydin”, “Toybuloq”, “Said ota“, ”Fayzobod" mahallasi hududlari ko‘zdan kechirilganda jami 57 tup ko‘p yillik sog‘lom daraxtlar tag qismidan noqonuniy kesilgan.

Mazkur holat yuzasidan o‘rganish ishlari davom etmoqda, uning natijalari yuzasidan qo‘shimcha ma’lumot beriladi.

Mavzuga doir:

• Xorazmda fermer xo‘jaligi yeridagi 83 tup daraxt qo‘porilgani aniqlandi
• Surxondaryoda “Qizil kitob”ga kiritilgan daraxtlar kesilgani yuzasidan jinoyat ishi qo‘zg‘atildi