Украинадаги урушда иштирок этаётган Россиянинг «Вагнер» гуруҳи Шимолий Кореядан қурол-яроғ сотиб олди. Бу ҳақда Reuters агентлигига АҚШнинг юқори мартабали мулозими маълум қилди.
Манбанинг таъкидлашича, «Вагнер» хусусий ҳарбий компаниясининг Украинадаги урушдаги роли ортиб бормоқда. Кремль томонидан назорат қилинадиган ҳарбий компания янги қуроллар учун пул тўлаган, хусусан, КХДР вагнерларга ракета ва снарядлар юборган.
«Шимолий Корея ‘Вагнеръга дастлабки қурол-яроғ етказиб беришни якунлади, бунинг учун гуруҳ пул тўлаган. Ўтган ой КХДР Россияга ракета ва снарядларни етказиб берди», — дейди расмий журналистларга.
Манба АҚШ кейинроқ эълон қилинадиган разведка маълумотларига асосланиб, баҳо беришини билдирди. Вашингтоннинг фикрича, Шимолий Корея томонидан етказилган ўқ-дорилар миқдори Украинадаги жанговар ҳаракатлар динамикасини ўзгартирмайди.
«Аммо Шимолий Корея ‘Вагнеръга кўпроқ ҳарбий техника етказиб беришни режалаштираётганидан хавотирдамиз», — деди манба.
АҚШ расмийлари Шимолий Кореянинг қурол савдоси БМТ Хавфсизлик Кенгаши резолюцияларини тўғридан-тўғри бузиш деб ҳисоблайди ва бу масалани Хавфсизлик Кенгашида муҳокама қилишни режалаштирмоқда.
Ноябрь ойида Шимолий Корея Россияга ҳеч қачон қурол экспорт қилмагани ва бундай қилишни режалаштирмаётгани ҳақида маълум қилганди. КХДР Россияда ўқ-дорилар тақчиллиги шароитида унга артиллерия снарядларини яширинча етказиб бераётганини Оқ уй Миллий хавфсизлик кенгашининг стратегик алоқалар бўйича координатори Жон Кирби айтганди.
Изоҳ (0)