Shavkat Mirziyoyev va Qosim-Jo‘mart To‘qayev qozoq shoiri Abay Qo‘nonboyev merosiga bag‘ishlangan ko‘rgazma doirasidagi ekspozitsiya bilan tanishdi. Bu haqda prezident matbuot xizmati xabar berdi.
Abay qozoq xalqining asriy orzularini, adolat, insonparvarlik va qardoshlik g‘oyalarini tarannum etgan. Uning she’riy asarlari va noyob “Nasihatlar” kitobiga jamlangan hikmatli so‘zlarini o‘qib, XIX asr oxirlarida qozoq dashtlaridagi turmush haqida aniq tasavvurga ega bo‘lish mumkin.
Davlat rahbarlari Qozog‘iston muzeylaridan keltirilgan noyob eksponatlar, jumladan, Abay Qo‘nonboyev hayoti va ijodiga oid tarixiy ashyolar, fotosuratlar, kitoblar bilan tanishdi.
Abayning uch torli do‘mbirasi, Qo‘nonboyning do‘ppisi, qo‘lyozmalari, adib va uning oilasi tasvirlangan fotosuratlar tomoshabinlarda qiziqish uyg‘otdi.
Prezidentlar ko‘rgazma bilan tanishib, mamlakatlar madaniy hayotidagi ushbu muhim tadbirni tayyorlashga hissa qo‘shganlarga minnatdorlik bildirdi. Bunday tadbirlar do‘stlik rishtlarimizni mustahkamlashga xizmat qilib, o‘zbek xalqida qardosh qozoq xalqining tarixiga qiziqish g‘oyat balandligidan dalolat berishi ta’kidlandi.
Ma’lumot uchun, shu kunlarda O‘zbekiston bo‘ylab Abay Qo‘nonboyev merosiga bag‘ishlangan madaniy tadbirlar o‘tmoqda.
Mavzuga doir:
- Mirziyoyev va To‘qayev qo‘shma investitsiya hamda sanoat loyihalariga start berdi (foto)
- O‘zbekiston va Qozog‘iston prezidentlari Shayx Xovandi Tohur va To‘labiy maqbaralarini ziyorat qildi
- “Bizning taqdirimiz bir, kelajagimiz ham umumiy, men bunga ishonaman”. O‘zbekiston va Qozog‘iston prezidentlari tor doirada muzokara o‘tkazdi
Izoh (0)