Шавкат Мирзиёев ва Қосим-Жўмарт Тўқаев қозоқ шоири Абай Қўнонбоев меросига бағишланган кўргазма доирасидаги экспозиция билан танишди. Бу ҳақда президент матбуот хизмати хабар берди.
Абай қозоқ халқининг асрий орзуларини, адолат, инсонпарварлик ва қардошлик ғояларини тараннум этган. Унинг шеърий асарлари ва ноёб «Насиҳатлар» китобига жамланган ҳикматли сўзларини ўқиб, XIX аср охирларида қозоқ даштларидаги турмуш ҳақида аниқ тасаввурга эга бўлиш мумкин.
Давлат раҳбарлари Қозоғистон музейларидан келтирилган ноёб экспонатлар, жумладан, Абай Қўнонбоев ҳаёти ва ижодига оид тарихий ашёлар, фотосуратлар, китоблар билан танишди.
Абайнинг уч торли дўмбираси, Қўнонбойнинг дўпписи, қўлёзмалари, адиб ва унинг оиласи тасвирланган фотосуратлар томошабинларда қизиқиш уйғотди.
Президентлар кўргазма билан танишиб, мамлакатлар маданий ҳаётидаги ушбу муҳим тадбирни тайёрлашга ҳисса қўшганларга миннатдорлик билдирди. Бундай тадбирлар дўстлик риштларимизни мустаҳкамлашга хизмат қилиб, ўзбек халқида қардош қозоқ халқининг тарихига қизиқиш ғоят баландлигидан далолат бериши таъкидланди.
Маълумот учун, шу кунларда Ўзбекистон бўйлаб Абай Қўнонбоев меросига бағишланган маданий тадбирлар ўтмоқда.
Мавзуга доир:
- Мирзиёев ва Тўқаев қўшма инвестиция ҳамда саноат лойиҳаларига старт берди (фото)
- Ўзбекистон ва Қозоғистон президентлари Шайх Хованди Тоҳур ва Тўлабий мақбараларини зиёрат қилди
- «Бизнинг тақдиримиз бир, келажагимиз ҳам умумий, мен бунга ишонаман». Ўзбекистон ва Қозоғистон президентлари тор доирада музокара ўтказди
Изоҳ (0)