O‘zbekiston 22-dekabr kuni Afg‘onistonga to‘qqizta maxsus yuk mashinasiga ortilgan insonparvarlik yordamini jo‘natgandi. TIV matbuot xizmati Hayraton shahrida ushbu insonparvarlik yordamini topshirishga bag‘ishlangan tantanali marosim haqida ma’lumot berdi.
Qayd etilishicha, umumiy og‘irligi 170 tonnadan ziyod bo‘lgan insonparvarlik yordami un, guruch, bug‘doy, o‘simlik yog‘i, konserva mahsulotlari, kiyim-kechak va poyabzaldan iborat.
Insonparvarlik yordamini topshirish marosimiga kelgan Ismatulla Irgashev va To‘ra Bobolov boshchiligidagi rasmiylarni Balx viloyati gubernatori Mullo Muhammad Dovud Muzammil va provinsiyaning boshqa boshqaruv idoralari vakillari kutib oldi.
Marosimda so‘zga chiqqan Balx viloyati gubernatori Mullo Muhammad Dovud Muzammil O‘zbekiston Prezidenti Shavkat Mirziyoyevga Afg‘oniston uchun og‘ir va sinovli pallada afg‘on xalqini qo‘llab-quvvatlagani va birdamligi uchun chuqur hamda samimiy minnatdorlik bildirdi.
O‘zbekiston rahbari ko‘pmillatli Afg‘oniston xalqiga birodarlik munosabati namunasini butun dunyoga yana bir bor namoyon etgani hamda bu tashabbus butun jahon hamjamiyati uchun yaqqol o‘rnak bo‘lishini alohida ta’kidlandi.
O‘zbekiston prezidentining Afg‘oniston bo‘yicha Maxsus vakili Ismatulla Irgashev va Surxondaryo viloyati hokimi To‘ra Bobolov Afg‘onistonga nafaqat insonparvarlik yordam ko‘rsatish, balki Surxondaryo viloyati va Afg‘onistonning Balx provinsiyasi ishbilarmon doiralari vakillari o‘rtasida savdo-iqtisodiy hamkorlikni faollashtirishning ustuvor yo‘nalishlarini ham qayd etdi.
Tomonlar O‘zbekistonning Surxondaryo viloyati va Balx provinsiyasi rahbarlari darajasidagi chegara masalalari bo‘yicha Qo‘shma ishchi guruhi ishini yaqin kunlarda Termiz shahrida navbatdagi yig‘ilishini o‘tkazish bilan davom ettirishga kelishib oldi. Bu nafaqat chegaraoldi hududlaridagi savdoni rivojlantirish, balki ikki davlat o‘rtasidagi iqtisodiy hamkorlikni mustahkamlashga ham xizmat qilishi ta’kidlandi.
Eslatib o‘tamiz, O‘zbekiston bundan avval sentabr oyida insonparvarlik yuklari jo‘natgandi. 58 tonnalik zarur oziq-ovqat mahsulotlari ortilgan avtomashinalar Hayraton chegara o‘tkazish punkti orqali Balx viloyati shimolidagi Kaldor tumaniga yetkazib berilgandi.
Izoh (0)