Iqtisodiy tahlilchi Abdulla Abduqodirov “Daryo” muxbiriga bergan intervyusida kuchli parlament barpo bo‘lishi uchun xalq o‘z nomzodlarini saylashi kerakligi haqida gapirdi.
Abdulla Abduqodirovning aytishicha, eng muhim masala xalq nomzodlarni o‘zi tanlashi zarurligi bilan bog‘liq.
“Parlamentchilik hech qaysi mamlakatda birdaniga zo‘r bo‘lib ketmagan. To‘g‘ri, bu sohada ham islohotlar amalga oshyapti. Lekin xalqimiz parlament a’zolarini saylanishida befarq bo‘lib turib, keyin ulardan biror narsani talab qilishi g‘alati hol. Avval saylovlarda faol qatnashaylik. O‘zimizga mos bo‘lgan va o‘zimiz istagan deputatlarni saylaylik. Keyin ulardan talab qilsak to‘g‘ri bo‘ladi. Hokim bergan bitta ro‘yxat bilan deputatlarga ovoz berib, o‘zimiz parlamentni saylab qo‘yganmiz, yana ulardan norozi bo‘lamiz. Keyingi saylovlarda sal boshqacharoq bo‘lishi kerak. Nomzodlarni o‘zimiz tanlashimiz lozim. Shunda ulardan ishni talab qilsak to‘g‘riroq bo‘ladi”, — dedi u.
Avvalroq siyosatshunos Kamoliddin Rabbimov ham parlament qanday bo‘lishi kerakligi haqida gapirgandi.
“Parlamentning ikkala palatasida ham siyosiy tafakkur shakllanib bo‘lgan. Bir qanchagina senator va deputatlar vaziyatni ijobiy tomonga o‘zgartirib turibdi. Keyingi saylovlarga ham oz qoldi. Va unga alohida e’tibor berish kerak. Parlament nihoyatda kuchli, professional, erkin va yuqori malakali bo‘lishi lozim”, — degan siyosatshunos.
Izoh (0)