Qozog‘istonning Ostona shahri markazida Alisher Navoiy haykali o‘rnatiladi. Bu haqda O‘zbekiston va Qozog‘iston rahbarlari ishtirokidagi muzokaralarda ma’lum qilindi.
Shavkat Mirziyoyev buyuk o‘zbek shoiri, davlat arbobi Alisher Navoiy haykalini o‘rnatish haqida qaror qabul qilingani uchun minnatdorlik bildirgan.
“Bu umumiy tariximiz va madaniyatimizga katta ehtiromning yorqin tasdig‘i, qardosh xalqlarimiz o‘rtasidagi do‘stlik rishtalari abadiyligi ramzidir, — degan prezident.
Shu bilan birga, davlat rahbari umumiy madaniy-tarixiy merosni o‘rganish va ommalashtirish bo‘yicha qo‘shma tadqiqotlar o‘tkazish, shu maqsadda TV, radio va veb-saytdan iborat qo‘shma axborot resursini tashkil etish, buyuk yozuvchi va shoirlarimiz asarlarini nashr qilishni taklif etgan.
Eslatib o‘tamiz, 2021-yilning dekabrida Oqo‘rdada ikki davlat rahbari ishtirokida bo‘lib o‘tgan muzokaralarda Qozog‘iston prezidenti o‘zbek va qozoq xalqining ma’naviy yaqinligi va ko‘p asrlik do‘stligi ramzi sifatida mamlakat poytaxtida Alisher Navoiy haykali o‘rnatilishini ma’lum qilgandi.
Alisher Navoiy haykali 2017-yilda Xitoydagi Shanxay universitetining markaziy maydoniga, 2018-yilda Dushanbe shahrida, 2019-yilda Belarusning Minsk shahrida o‘rnatilgan. 2021-yilda esa Koreyaning Seul shahrida ushbu davlat arbobining byusti o‘rnatilgan.
Izoh (0)